Avropa Liqasında Liqa mərhələsinə yekun vurulub.
Turnirdəki təmsilçimiz "Qarabağ" da sonuncu - 8-ci turun oyununa çıxıb.
Ağdam klubu Yunanıstanda "Olimpiakos"la qarşılaşıb və 0:3 hesabı ilə uduzub. Bununla da, komandamız Avroliqanı sonuncu pillədə başa vurub.
“Sportinfo TV”nin aparıcı eksperti Elçin Cəfərov qarşılaşma haqda şərhlər verib.
Tanınmış jurnalist deyib ki, illərdir ölkəmizi Avropada uğurla təmsil edən “köhlən atlar” bu mövsüm çox uğursuz nəticələrə imza atıb.
Ağdam təmsilçisi Avropa Liqasının Liqa mərhələsinin ilk dəfə tətbiq olunduğu sezonda böyükhesablı məğlubiyyətlərlə yadda qalıb:
“Qurban Qurbanov demişkən, “Qarabağ” hər turnirdə çətin matçları oynadıqca böyüyür. Amma bir reallıq var - yerli futbolçularımız heç “böyümürlər”.
Bu qarşılaşmada komandamız topu özündə çox saxlamağa səy göstərsə də, dönən topları zamanında qazana bilməmək müdafiə olunmada ciddi problemlər yaratdı.
Nə vaxta qədər Zubirin lazımsız top saxlamalarına baxacağıq? Azərbaycan azarkeşi nə üçün Musa Qurbanlı və Nəriman Axundzadəyə ümid bağlamalıdır?
Əgər dünənki matçda Juninyo olsaydı, epizodların ən azı ikisini qola çevirə bilərdi. Ona görə də legioner limitinin sərbəst olmasının tərəfdarıyam.
Yerli futbolçularla Biləcəridən o tərəfə keçə bilmərik. Bu, özünü dünən Pireydə bir daha göstərdi”.
VİDEONU BU LINKƏ DAXİL OLARAQ İZLƏYİN
.jpg)
