Hə…

Bax belə…
Yüzdə doxsan faiz «Qarabağ» 2 turdan sonra Avropa səhnəsi ilə vidalaşacaq.

Avroliqanın Liqa mərhələsində dayanmaq ehtimalı İsveçdə gücləndi. «Elfsborq»a uduzmaqla.

Mən deməzdim ki, «Elfsborq» «Qarabağ»ın qitə arenasında üz-üzə gəldiyi ən zəif rəqiblərdən biridir.

«Qarabağ»ın gördüyü ən güclü rəqiblərdən biri olduqlarını da deməzdim. Ortabab bir komandadır.

Keçən mövsümün «Qarabağ»ı olsaydı, artıq pley-off mərhələsinə vəsiqə qazanmışdı, şansını son turlara saxlamamışdı.

Artıq o «Qarabağ» yoxdur. Deməli, biz bu günün «Qarabağ»ı üzərindən incələmə etməliyik.

Əslində, uzun-uzadı incələməyə da gərək duymuram. Hər şey ortadadır, bəllidir - builki «Qarabağ» kölgədir.

«Qarabağ» yorğun və əzgindir. Komandanın aparıcı futbolçularının hamısı doyub. Təqvimin sıxlığı hər birini funksional cəhətdən haldan salıb. Psixoloji durumları da həmçinin.

«Elfsborq» 10-15 dəqiqə «Qarabağ»ın üstünə gəldi, istədiyi qolu da vurdu. Muncuq kimi komandadır - sürətli, texnikalı və döyüşçü.

Bunların hər biri onlarda var. Onlarda olan «Qarabağ»da da var. Ondan da artıq.

Bəla burasındadır ki, heç kim qol vura bilmir.

Juninyo önünə düşən topları yenə «çərçivə»yə göndərmədi.

Leandro Andrade qol pası verməyə yenə xəsislik etdi.

Abdullah Zubir məsul olduğu cinahda yenə passiv təsir bağışladı.

«Qarabağ» həmişəki üslubuna sadiqdir. Cərimə meydançasına kimi gəlir, ortada, «qanadlar»da top çevirir, «yuvarlaq meşin»i düz qapıçının «qulağının dibinədək» gətirə bilir, o qolu vuran isə tapılmır.

Bunu edən lazımdır. Edən yoxdursa, Qurban Qurbanovdan radikal qərarlar gözləməyə dəyər.

Şəxsən bəndəniz təcrübəli adamın bu addımı atacağına inanır.

İndidən deyim, istisna etmirəm - baş məşqçi komandanı avrokuboklarda işıq gələn tərəfə aparmayan aparıcı fiqurantlardan birini, yaxud ikisini yeni ilin əvvəlində başqa yerə göndərəcək.

«Qarabağ»dan bu yöndə xəbərlər almağa hazır olaq. Qış fasiləsində olmasa da, ən uzağı, yayda düşərgədən göndərilənlərin adları bir-bir açıqlanacaq.

«Qarabağ»a «yeni qan» tələb olunur. Bunu biz başa düşürüksə, Qurban Qurbanov dünəndən bilir. O. sadəcə, səbrlidir, sonadək futbolçunun arxasında dayanır, gözləyir.

Amma təbii, səbr kasası bir gün dolur. O daşanda isə…

MUSA