“Qarabağ” prinsipial oyunda “Neftçi”ni darmadağın etdi.
Premyer Liqanın ilk dövrəsində əzəli rəqibi üzərində 4:0-lıq qələbəyə sevinən “köhlən atlar” bu dəfə rəqib meydanında bayram etdi – 3:0.
Oyun başa çatandan sonra Sportinfo.az-a açıqlama verən Patrik Andrade qalibiyyət təəssüratlarını bölüşüb:
“Baxımlı, maraqlı və bol qollu oyun oldu. Həftəiçi məşqlərdə bu oyuna hazırlaşmışdıq. Avropa Liqasında “Lion”a məğlubiyyət əhvalımıza təsir etsə də, konsentrasiyanı qorumağa çalışırdıq.
“Neftçi” hər nə qədər xüsusi rəqib olsa da, matça sadə yanaşırdıq, emosiyalara qapılmırdıq. Digər oyunlara necə baxırıqsa, buna da elə hazırlaşırdıq.
Kollektiv oyun göstərməklə qələbə qazanmağı bacardıq. Odur ki, hamımız xoşbəxtik”.
Təcrübəli müdafiəçi qarşılaşmadan əvvəl böyük hesablı qələbəni yox, qələbəni düşünürmüş:
“Futbolda heç kim nəticə ilə bağlı zəmanət verə bilməz. Açığı, oyundan öncə hansısa hesab barədə düşünmürdüm,
2:0, 3:0 və ya 0:0. Məqsədim və məqsədimiz qalib gəlib xallarımızın sayını artırmaq idi. Əsas olan hədəfə çatmaqdır.
“Neftçi” həqiqətən yaxşı rəqibdir. Fərdi keyfiyyətləri yüksək olan futbolçulara sahibdir.
Ona görə də bu komandayla oyunlarımız gərgin və maraqlı keçir. Tribunalardakı atmosfer də xoş olur. Fikrimcə, derbi adına maraqlı oyun alındı”.
HƏBİB
