Premyer Liqanın 15-ci turunun “Neftçi” - “Qarabağ” matçında (0:3) meydan sahibi azarkeşlərinin narazılığına səbəb olan hadisə yaşanıb.
Sportinfo.az xəbər verir ki, bu, 27-ci dəqiqədə “Qarabağ”ın yarımmüdafiəçisi Leandro Andradenin hesabı açdıqdan sonra baş verib.
Kapo-verdeli komanda yoldaşı Kevin Medina ilə birgə “Neftçi” azarkeşlərinin oturduğu qapının arxa tribunası önündə qol sevinclərini qalib ədası formasında şəkil çəkdirməklə ifadə ediblər. Bu isə yerli azarkeşlərin etirazına səbəb olub.
Baş hakim Əliyar Ağayev dərhal hər iki legionerə sarı vərəqə göstərib. Bu, azarkeşlərə yönələn qıcıqlandırıcı hərəkət kimi qiymətləndirilib.
Futbolçular isə əlləri ilə işarə ediblər ki, sadəcə, fotoqraflara şəkil çəkdirmək üçün belə addım atıblar.
