Emmanuel Petit deyib ki, Mbappe gözə gəlib.
Fransa millisinin sabiq futbolçusu çoxlarının buna inanmadığını söyləyib, amma onun fikrincə, Mbappenin uğursuzluqları futbolla bağlı deyil.
"Real"ın fanatlarını Mbappenin dərdi götürübsə, biz də Juninyoya görə narahatıq. Ötən mövsüm qolları sıralayan braziliyalı futbolçunun ayağı tutulub. Göz dəyib, yoxsa cadu eləyiblər onu...
"Qarabağ" "Lion"la oyunda çoxsaylı qol epizodlarına girsə də, fürsətləri dəyərləndirə bilmədi. Əksərini məhz Juninyo qaçırdı.
Tirə vurdu, əyri vurdu... Hətta 6-cı dəqiqədə qapıçı ilə təkbətəki də qola çevirməyi bacarmadı.
Yeri gəlmişkən, həmin epizodda oyundankənar vəziyyət qeydə alınsa da, təkrardan belə görünmədi. Bəlkə də çəkiliş rakursu aldadıcı idi. Amma qol olsaydı, sayılmaq ehtimalı böyük idi.
Bu avrokubok mövsümündə "Qarabağ"ın vuran ayağı axsayır. Amma hələ də gec deyil. Juninyo üzərinə düşəni etsə, son 3 oyunda yaxşı nəticələr qazanıb pley-offa çıxmaq olar (sportal.az).
Həmid
