"Qarabağ" Premyer Liqada növbəti qələbəsini Bayılda qazandı.

"Səbail"in qonağı olan "atlılar" 3 xalı 3 qolla aktivinə yazdıra bildi.

Tablodakı nəticədən fərqli olaraq, meydandakı qələbə qonaqlar üçün heç də asan başa gəlmədi.

Əbəs deyil ki, tərəflər fasiləyə qolsuz bərabərliklə yollanmalı oldu.

Fasilədən sonra isə Kaşuk rüzgarı əsməyə başladı.

O, öncə matçın 4-ci dəqiqəsində əla ötürmə ilə Juninyonu qol vurmaq məcburiyyətində buraxdı.

18 dəqiqə sonra isə Kevin Medinanın əla ötürməsini ustaca ram edib, bir qədər irəlilədikdən sonra baxımlı hücuma yaraşan formada qapıdan keçirdi.

Leandro Andradenin son dəqiqələrdə vurduğu qol sadəcə yekun hesabı müəyyənləşdirdi.

Nəticəni ukraynalının qolu və məhsuldar ötürməsi həll etmişdi.

24 yaşlı vingerin "Sumqayıt"la oyundakı debütü barədə yazarkən qeyd etmişdik ki, ona vaxt lazımdır. Hətta uzun vədədə.

Amma görünən odur ki, Qurbanov gözləniləndən də erkən 24 yaşlı legioneri əvvəlki formasına qaytara biləcək. O, bu işin ustasıdır axı. Məgər bu günə qədər Kaşuk kimilərini uçurumdan zirvəyə az aparıb? Hələki bu yolda əməliyyat uğurla davam edir.

Tədricən əsas heyətdə özünə yer edən istedadlı futbolçunun faydalı iş əmsalı da artan templə gedir.

O, son iki matçda 2 qol, 1 məhsuldar ötürmə ilə yadda qalıb.

Ümumilikdə isə meydana çıxdığı 6 Premyer Liqa matçında 3 qol, 3 asistlə "köhlən atlar"a fayda verə bilib.

XANOĞLAN/ SPORTİNFO.AZ