Avropa Liqasının qrup mərhələsində mübarizə aparan “Qarabağ”ın növbəti rəqibi “Lion”dur.
Liqa mərhələsinin IV turunda səfərdə “Budyo Qlimt”i məğlub edərək (2:1) ilk qələbəsini qazanan ağdamlılar növbəti 3 xalın arzusundadır.
Sözsüz, “Lion” Fransanın köklü klubudur, avrokuboklarda zəngin təcrübə sahibidir. Lakin oyunun Bakıda keçiriləcəyini nəzərə alsaq, “köhlən atlar”ın qələbəyə sevinmək şansı heç də az deyil.
“Qarabağ”ın əsas simalarından olan Kevin Medina Sportinfo.az-a məlum qarşılaşma ilə bağlı açıqlama verib:
“Lion”un gücü barədə danışmağa ehtiyac yoxdur. Avropanın tanınmış və təcrübəli komandalarından hesab olunur.
Artıq neçə vaxtdır Bakıda qələbə qazanıb, azarkeşlərimizi sevindirə bilmirik. Qələbə onların haqqıdır.
Rəqibin adına baxmayaraq, qalib gəlib xallarımızın sayını artırmaq və ən əsası, azarkeşlərimizi sevindirmək üçün əlimizdən gələni edəcəyik”.
Noyabrın 28-də Tofiq Bəhramov adına Respublika stadionunda baş tutacaq qarşılaşma saat 21:45-də start götürəcək.
HƏBİB
