“Ümumi hesabda 2 top geri düşəndə içimdə bir ümid var idi.

Dua elədim ki, Allah, bizə kömək et”.

“Qarabağ”ın prezidenti Tahir Gözəl Sportinfo.az-ın əməkdaşına verdiyi açıqlamaya bu sözlərlə başlayıb.

“Köhlən atlar” Bakıda məğlub olduğu “Ludoqorets”i səfərdə 7:2 hesabı ilə məğliub edərək Çempionlar Liqasının pley-off mərhələsinə yüksəldi.

Tahir bəy “köhlən atlar”ın fiziki hazırlığını xüsusi şəkildə qabardaraq “Qarabağ”ı ilk dəfə bu səviyyədə gördüyünü bildirib:

“Ardıcıl ikinci oyunda hesabda geri düşmək ağır idi. Amma yenə də ümidimi itirmirdim, yaxşı olacağını düşünürdüm.

120 dəqiqə oynamağın nə qədər güc tələb etdiyini bu oyunda başa düşdüm. Baxın, son 4 qolu əlavə olunmuş 30 dəqiqədə vurduq.

Bunun özü böyük cəsarət deməkdir. Biz qolları sıraladıqca onların futbolçuları çarəsizlikdən, yorğunluqdan yerə uzanırdılar.

Qurban Qurbanovun məşqçi bacarığı, məharəti hər kəsə məlumdur. Eyni zamanda, “Qarabağ” Avropanın aparıcı komandalarına xas fiziki hazırlıq sərgiləyir.

Gizlətmirəm, “Qarabağ”ı ilk dəfə bu səviyyədə gördüm. Komanda hər ötən il yeni mərhələyə yüksəlir.

Tarixi qələbəyə görə möhtəşəm qürur hissi keçirirəm”.

Azərbaycan çempionu Çempionlar Liqasının pley-off mərhələsində Zaqreb “Dinamo”su ilə qarşılaşacaq.

İlk oyun avqustun 20-də Zaqrebdə, cavab qarşılaşması bir həftə sonra Bakıda baş tutacaq.

HƏBİB