"İmkanım olsaydı, hakimin özünə sarı vərəqə göstərərdim".

Bu sözləri "Qarabağ"ın futbolçusu Kevin Medina Avropa Liqasının qrup mərhələsində "Molde" ilə səfərdə 2:2 hesablı heç-heçə etdikləri oyunundan sonra Sportinfo.az-a açıqlamasında deyib.

Kolumbiyalı müdafiəçi matçın 2-ci hissəsində sarı vərəqə alaraq cəzalı duruma düşüb. O, hakimin bu qərarından narazı olduğunu bildirib:

"Hakimin həmin epizodda mənə sarı vərəqə göstərməyinə nə lüzum var idi? Mənə dedi ki, meydanı tez tərk et.

Mən də bildirdim ki, ağrım var, necə sürətli çıxım? Bəzən hakimlər də aqressiv olurlar və baş rolda olmağa çalışırlar".

Medina Norveçdən yaxşı nəticə ilə döndüklərini də qeyd edib:

"Yaxşı rəqibə qarşı oynadıq. "Molde", xüsusən də, evdə təhlükəli olur. Yenə də məlum şərtlər altında istəyimizə nail olduq.

Əsas da budur. Rəqib çox güclü komanda idi. Ümumi şərtlər heç də bizim xeyrimizə deyildi.

Məqsədimiz meydanı sərfəli nəticə ilə tərk etmək idi. Hesabda geridə olsaq da, sona qədər xarakter göstərdik".

Zədələnərək məcburi əvəzlənməli olan Medina ağrıları olduğunu bildirib:

"Bakıda MRT müayinəsindən sonra vəziyyətimə tam aydınlıq gələcək. Düşünmürəm ki, əvəzlənməyimin hansısa mənfi təsiri oldu.

Meydanda qalsaydım, bəlkə də, yenə eyni nəticə qeydə alınacaqdı".

P.S. Jurnalistlərin Norveçə ezamiyyəti Etopaz-ın dəstəyi ilə həyata keçirilib.

XANOĞLAN