Nikita Tarbyakov 2024/25 mövsümün birinci yarısında Azərbaycanın I Liqa təmsilçisi “Baku Sportinq”də oynayıb..
Dörd ay sonra isə o, klubu tərk edib.
22 yaşlı mərkəz müdafiəçisi indi ölkəsinin “Lida” klubunun formasını geyinir.
Sportinfo.az xəbər verir ki, Terbyakov Belarusun football.by saytına açıqlamasında “Baku Sportinq”dən narazılığını bildirib, klubun ona 2 aylıq borcu ödəmədiyini iddia edib.
O, “Baku Sportinq”də uzun müddət qala bilməməsinin səbəblərinə toxunarkən deyib:
“Açıq və səmimi danışsaq, “Baku Sportinq” mənimlə düzgün davranmadı.
Klub mənə məlum olmayan səbəblərdən Azərbaycanda leqallaşma məsələmi həll edə bilmədi. Buna görə də ilk dövrənin bitməsinə üç tur qalmış
Bakıdan ayrılmaq məcburiyyətində qaldım. Çünki miqrasiya xidməti ilə ciddi problemlər yaşamamaq üçün risk etmədim.
Maraqlıdır ki, hava limanında yeni bir problem ortaya çıxdı. Klub mənim müvəqqəti qeydiyyatımı vaxtında etməmişdi, buna görə də 600 Belarus rublundan çox məbləğdə (təqribən 310 manat - red.) cərimə ödədim.
Bu azmış kimi, “Baku Sportinq” mənə iki aylıq maaşı da ödəmədi. Klub rəhbərliyi daima vədlər verirdi, amma kartıma heç bir ödəniş gəlmədi.
Nəticədə, əməkdaşlığımızı dayandırmaq məcburiyyətində qaldım”.
