“Təqdim edilən dəyişiklik pensiyaların ödənilməsində maliyyə təminatının genişləndirilməsi və fiskal dayanıqlığın gücləndirilməsi baxımdan vacibdir”.

Bunu deputat Vüqar Bayramov Milli Məclisin Əmək və sosial siyasət komitəsinin iclasında “Əmək pensiyaları haqqında” Qanunun müzakirəsi zamanı bildirib.

O əlavə edib ki, bu, dövlət büdcəsi ilə Dövlət Sosial Müdafiə Fondunun (DSMF) maliyyə öhədliklərinin dəqiqləşdirilməsinə xidmət edir: “Dəyişiklik dövlət büdcəsi hesabına güzəştli şərtlərlə pensiya alanların dairəsinin genişləndirilməsinə xidmət edəcək. Məhz bu səbəbdən dövlət büdcəsindən DSMF-yə transfertlərin məbləği 2025-ci ildə əvvəlki ilə nisbətən 208 milyon artırılaraq 1 milyard 600 milyon manata çatdırılır.

Güzəştli şərtlərlə pensiya yaşı müəyyənləşdirilən zaman kəmiyyət indikatorları ilə yanaşı, keyfiyyət meyarlarından da istifadə edilməsi məqsədəuyğun olardı. Bu gün müzakirə etdiyimiz “Əmək pensiyaları” haqqında Qanuna əsasən, valideynlərini itirmiş və ya valideyn himayəsindən məhrum olmuş səkkiz yaşınadək övladlığa və ya qəyyumluğa götürülmüş uşaqlar da daxil olmaqla, beş və daha çox uşağı olanlar 5 il daha tez pensiyaya çıxırlar. Müzakirə etdiyimiz dəyişikliklərlə onların pensiya təminatı dövlət büdcəsi hesabına həyata keçiriləcək. Bununla belə, 5 uşağı olanla 5-dən daha çox uşağı olanların pensiya güzəşti eynidir. Halbuki uşaqların sayına görə pensiya yaşının azaldılması daha məqsədəuyğun olardı.

Bu halda daha çox övladı olan valideynlər daha tez pensiyaya çıxa bilərlər. Bu kontekstdən pensiya yaşının müəyyənləşdirilməsində keyfiyyət meyarlarından istifadə sosial təminat baxımdan da arzuolunandır”, - deyə deputat bildirib.

Deputat Jalə Əliyeva isə bildirib ki, çoxuşaqlı ailə anlayışına yenidən baxmalıyıq.

“Bu gün dünyamızda və ölkəmizdə beş və daha çox uşağı olan ailələr nadir hadisəyə çevrilib. Gündəlik həyatımızda gördüyümüz kimi, ailədə üç və daha çox uşaq varsa, bu, hardasa çoxuşaqlı ailə sayılır. Ona görə də düşünürəm ki, həm ölkədəki demoqrafik vəziyyəti, həm doğum-ölüm nisbətinin, təəssüflər olsun ki, bərabərləşməsini nəzərə alaraq çoxuşaqlı ailə anlayışı məsələsinə birdaha qayıtmalı və yenidən baxmalıyıq.

Milli Məclis olaraq biz öz təklif və tövsiyyələrimizi bu məsələdə verə bilərik”, - deyə, millət vəkili əlavə edib.