"Nürnberq"in hücumçusu Mahir Emreli ilə baş məşqçi Miroslav Kloze arasında növbəti fikir ayrılığı yaranıb.
Sportinfo.az xəbər verir ki, bu barədə Almaniyanın "Bild" nəşri məlumat yayıb.
Bildirilir ki, bu, M.Emrelinin oyunu ilə əlaqədardır. Məlumata görə, bugünlərdə "İnqolştadt"a qarşı yoxlama matçında rəqib üçüncü liqa təmsilçisi olsa da, Kloze Emreliyə xüsusi nəzarət edib.
Bildirildiyinə görə, top rəqibdə olarkən Emrelinin oyunu baş məşqçini həmişə razı salmırdı.
Qəzet yazır ki, Emreli qol vurmağına baxmayaraq, Kloze bir neçə dəfə uca səslə azərbaycanlı futbolçudan daha fəal olmağı və rəqibləri üzərinə daha intensiv hücum etməyi istəyib.
"Beləliklə, texniki cəhətdən güclü, lakin bir qədər özünəməxsus hücumçu Klozenin etimadını tam qazanmaq üçün mübarizəni davam etdirməli olacaq" - deyə qəzet yazır.
Nəşr güman edir ki, M.Emreli bu həftənin bazar günü "Karslue"yə qarşı keçiriləcək 18-ci turun oyununda da ehtiyatda qalacaq.
M.Emreli 17-ci turda "Ayntraxt"la oyunda ehtiyatda qalıb.
.jpg)
