Dekabrın əvvəlində insult keçirən “Turan Tovuz”un baş meneceri İman Həsənov müalicəsini ev şəraitində davam etdirir.
Səhhətində gözlənilmədən problem aşkarlanan Premyer Liqanın ən stajlı rəsmilərindən biri təcili əməliyyat olunmuşdu.
Əməliyyatın xərclərini “Turan Tovuz”un İdarə Heyətinin sədri Ehtiram Quliyev üzərinə götürmüşdü.
Həsənovun duruma hər ötən gün yaxşıya doğru dəyişməkdədir. Evdə ailə üzvlərinin köməkliyi sayəsində səhhətində irəliləyiş müşahidə olunan klub rəsmisi ayağa dura, addım ata bilir. Danışarkən nitqində müəyyən qüsurlar nəzərə çarpır. O da zamanla keçəcək.
Həkimlərin qadağan etdiyi müəyyən qidalar və hərəkətlər var ki, onlardan uzaq durmaq mütləqdir.
Qısası, “Tovuzun İman”ı ən qısa zamanda çətin günləri geridə qoyub, sevdiyin işin başına keçəcək. Sadəcə, bir müddət səbrli davranmaq lazım gələcək.
Maraq üçün bildirək ki, İman bəy Azərbaycanın ilk milli çempionatından bu günə qədər klub sektorunda çalışan yeganə şəxsdir.
HƏBİB / SPORTİNFO.AZ
