.jpg)
28-ci turun ən prinsipial matçı Tovuzda baş tutdu.
Premyer Liqada qalmaq uğurunda mübarizə aparan iki komanda - "Kəpəz" və "Səbail" üzə-üzə gəldi.
Qərb bölgəsinə böyük ümidlərlə yollanmışdıq.
Ki, keyfiyyət aşağı ola bilər, amma meydanda mübarizə, əzmkarlıq görəcəyimizə əmin idik.
Qonaqlar qələbə qazanmağa məhkum idi, meydan sahibləri yerini möhkəmləndirməyə.
Sən saydığını say, gör, meydandakı 22 futbolçu nə sayır.
Kənardan görünən o idi ki, sanki matç hansısa veteranın yubileyinə həsr olunub.
Futbolçularda istək aşağı, ikili mübarizələrdə mübarizə yox səviyyəsində.
Hesabda önə çıxan "Kəpəz" fərqi artırmağa, bərabərlik qolunu vuran vuran "Səbail" isə qələbə barədə zərrə düşünmürdü. Meydanda kiminsə tələsdiyini, canfəşanlıq etdiyini görmədik.
Qarşılaşmadan öncə Gəncə təmsilçisinin yeni rəhbərliyi futbolçulara qələbə təqdirində 5000 manat mükafat vəd etdiyini xəbər vermişdik.
Kifayət qədər böyük məbləğdə ənam da futbolçuları daha "diri" görünməsinə yol açmadı.
Son dəqiqələrdə qonaq futbolçuların cərimə zərbəsini başlamaq üçün topu bir-birinə ötürməsi artıq hər şeyin dibi idi.
Ağıla gələn ilk sual - həqiqətən, bu klublar elitada qalmaq istəyir?
Axı Premyer Liqada qalmaq istəyən klubların istəyi bu qədər dərində olmalı deyildi.
XANOĞLAN İMANOV
