Xəbər verdiyimiz kimi, Premyer Liqanın gələn mövsümündə iştirakçı sayının artırılması gözlənilir.
Rəhbərlik sözügedən məsələni daxili müzakirəyə çıxarıb.
Qurumun prezidenti Rövşən Nəcəf vitse-prezidentlər və digər rəsmilərin bununla bağlı mövqeyini öyrənib. Əksəriyyət bu təşəbbüsü dəstəkləyib.
Elitada klub sayının çoxaldılmasının sabah keçiriləcək İcraiyyə Komitəsinin iclasında da gündəmə gətirilməsi nəzərdə tutulub.
Prezident Rövşən Nəcəfin təlimatına əsasən, komitə üzvlərinə toplantının yeri və saatı barədə məlumat verilib.
Əslində, İK ötən həftə yığışmalı idi. Lakin son anda AFFA başçısının SOCAR-da digər işlərinin ortaya çıxması səbəbindən yığıncaq ertələnməli olub.
Az öncə bu mövzuda son dəqiqə məlumatı əldə etmişik.
Federasiyadan redaksiyamıza daxil olan informasiyaya görə, Premyer Liqada iştirakçı sayının 12-14-ə qədər artırılması müzakirələrin mərkəzində dayanır.
Əgər İK üzvləri çempionatda 12 komandanın yarışmasına qərar verərsə, I Liqada ilk 3 pilləni tutanlar birbaşa yuxarı buraxılacaq. Premyer Liqanı sonuncu yerdə bitirəcək klub isə qeyd-şərtsiz aşağı dəstəyə göndəriləcək.
İkinci plana görə, İK Premyer Liqada 14 yarışmaçının olmasını istəyərsə, I Liqada sezonu birinci «beşlik»də başa vuranlar elitanın qapısını döyəcək.
SPORTİNFO.AZ
