Azərbaycan Premyer Liqasında təxminən 1 aylıq fasilə bir neçə gün əvvəl start götürdü.

Tətil 17 yanvar başa çatacaq.

Klublar isə rəsmi oyunlara hazırlıq üçün yanvarın əvvəli bir araya gələcək.

Artıq toplanış planları da açıqlanıb. "Turan Tovuz" hazırlıq üçün Türkiyəni seçibsə, digər 9 komanda ölkədə qalmağı məqsədə uyğun hesab edib.

Klubların açıqladığı plana baxanda bir məqam xüsusi diqqət çəkməyə bilməz.

Təmsilçilərimizin heç biri sınaq görüşləri üçün qapılarını Birinci Liqa təmsilçilərinin üzünə açmayıb.

Halbuki ölkə xaricində toplanış keçən zaman klublarımızın sınaq matçlarında digər ölkələrin nəinki ikinci, bəzən region liqasında çıxış edən klubları ilə üz-üzə gəldiyinə şahidlik etmişik.

Nədənsə bizim aşağı liqa klubları görməzdən gəlinib. Əslində belə görüşlər digər liqa iştirakçıları üçün də yaxşı təcrübə olar. Elita klubundakı ab-havanı hiss etmiş olarlar. Ehtimal az olsa da kiminsə özünü göstərmək şansı yarana bilər.

Lakin mövsüm ərzində 4 dəfə üz-üzə gələn komandalar bir də toplanış müddətində qarşılaşmağı seçiblər.

Başqa vaxt məşqçilər və futboçular eyni rəqiblərlə tez-tez qarşılaşmaqdan gileylənir.

"Araz Naxçıvan" əvəzedici komandası ilə oynamağı belə aşağı liqa təmsilçisi ilə oynamaqdan üstün tutub. Sadəcə sonra ikinci komanda "Sumqayıt"la əvəzləndi.

Bu, növbəti dəfə Premyer Liqa ilə Birinci Liqa arasındakı uçurumun böyük olmasına işarədir.

Əksi olsaydı, heç olmasa yoxlama görüşlərində aşağı liqa təmsilçilərinə rəqib gözü ilə baxardılar.

XANOĞLAN İMANOV