Bu gün Premyer Liqada 29-cu tura start veriləcək.
Sportinfo.az xəbər verir ki, turun qapanış oyunu aprelin 7-də “Şamaxı” ilə “Neftçi” arasında keçiriləcək.
Komandalar arasında rəqabət əslində, 1999-cu ildən başlayıb. “Şamaxı” həmin dönəmdən bəri müxtəlif adlar altında fəaliyyət göstərib.
Komanda “Neftçi” önünə gah “Xəzər Universiteti”, gah “İnter”, gah “Keşlə”, gah da “Şamaxı” kimi çıxıb.
Geridə qalan illərdə tərəflər arasında Premyer Liqada 77 oyun baş tutub. “Neftçi”nin üstünlüyü nəzərəçarpacaq dərəcədədir.
Belə ki, “ağ-qaralar”ın 43 qalibiyyətinə bölgə təmsilçisi 16 qələbə ilə cavab verə bilib. Top fərqində də aradakı fərq böyükdür – 122:71.
Düzdür, “Neftçi” son 3 səfər matçında qol vura bilməyib. Lakin “Şamaxı” artıq 9 görüşdür bu rəqibindən 3 xal almaqda acizdir.
“Şamaxı” axırıncı dəfə “Neftçi”ni məğlub edəndə Bakıda məskunlaşmışdı və “Keşlə” adını daşıyırdı. Bu, 3 il 5 ay əvvələ – yəni 2021-ci ilin noyabrına təsadüf edib.
Aprelin 7-də Şamaxı şəhər stadionunda keçiriləcək qarşılaşma saat 15:30-da başlayacaq.
