Ölkə kubokunun finalına “Neftçi”nin, yoxsa “Sabah”ın vəsiqə qazanacağı ilə bağlı müəmmaya bu ay aydınlıq gələcək.
Finala yüksəlmək, sonra da titul qazanmaq uğrunda mübarizə aparmaq üçün əsas yol aprelin 2-dən keçir. Məhz bu tarixdə əldə olunacaq mümkün qalibiyyət və ya sərfəli nəticə finalçının adına böyük ölçüdə aydınlıq gətirəcək.
“Neftçi”ylə “Sabah”ın dərdi eynidir.
Hər ikisi Premyer Liqanı medalla başa vurmaq şansını heçə endirib.
Hər ikisi qeyri-sabit nəticələrlə yadda qalmaqdadır.
Hər ikisi gözünü kuboka dikib.
Hər ikisi üçün kubokun qazanılması irəliləyişə səbəb ola bilər.
Odur ki, ilk və cavab görüşlərini erkən final adlandıra bilərik. Bu görüşlər həm “Neftçi”, həm də “Sabah” üçün mövsümün ən vacib qarşılaşmaları kimi qiymətləndirilir.
“Ağ-qaralar”ın azarkeşləri aylardır gözlədiyi dueldə “Neftçi Arena”nın yarısını dolduracaqlarına dair mesajı çoxdan verib. Əsas məqsəd doğma meydandakı matçda qələbə qazanmaqla cavab görüşü öncəsi üstünlük əldə etməkdir.
Yeri gəlmişkən, “tələbələr” finala vəsiqə qazana bilməsə, bu, baş məşqçi Vasili Berezutskinin Azərbaycan karyerasının sonu olacaq.
Aprelin 2-də “Neftçi Arena”da baş tutacaq oyunun start fiti saat 19:30-da çalınacaq.
HƏBİB / SPORTİNFO.AZ
.jpg)
