Həftələrdir gözlənilən an yetişdi.

Samir Abasovun çalışdırdığı “Neftçi” Premyer Liqanın 15-ci turunda Qurban Qurbanovun “Qarabağ”ını qəbul edəcək.

Bu komandalar arasında illərə söykənən prinsipiallıq barədə uzun-uzadı danışmağa gərək yoxdur. Söhbət əzəli və əbədi rəqiblərin duelindən gedirsə, vəziyyət məlumdur.

Ötən həftə “Zirə”ni məğlub etməklə daxili ab-havanı nisbətən qaydasına salan “ağ-qaralar” qış fasiləsinə qədər xalların sayını artırmaq niyyətindədir. Ağdamlılar isə prinsipial rəqibinə məğlubiyyəti ağıllarından keçirmirlər.

Monteneqro millisinin də şərəfini qoruyan Edvin Kuç Sportinfo.az-a açıqlamasında oyunla bağlı fikirlərini dilə gətirib:

“Qarabağ”ın hansı səviyyəsə malik olduğunu bilirik. Səviyyəli futbolçulara sahib təcrübəli komandadır.

Əlbəttə, çətin oyun olacaq. Lakin biz evdə, azarkeşlərimizin qarşısında oynayırıq.

Bu üstünlükdən yararlanmaq istəyirik. Yaxşı nəticə qazanmaq üçün əlimizdən gələni edəcəyik. Allahın bizi istəyimizə çatdıracağına inanıram”.

Kuçun “hazırkı “Neftçi”nin bu “Qarabağ”ı udması mümkün görünür” sualına cavabı qəti olub:

“Niyə də yox?! Mümkünsüz heç nə yoxdur. Öz gücümüzə inanmalı, təmkinli olmalı, əvvəldən sona qədər mübarizə aparmalıyıq. “Neftçi”nin bütün komandaları udmaq üçün keyfiyyəti var”.

Dekabrın 1-də “Neftçi Arena”da baş tutacaq oyun saat 19:00-da start götürəcək.

HƏBİB