“Neftçi”nin ötən günlərindən uzaq düşməsi göz qabağındadır.

2011-2013-cü illər aralığında tarixinin ən parlaq dönəmini yaşayan “ağ-qaralar” o vaxtdan bu yana yalnız bir dəfə - 2021-ci ildə çempionluq sevincini təkrarlayıb.

Son vaxtlar qızıl bir tərəfə, gümüş medalları qazanmaq, ölkə kubokunu muzeyə aparmaq müşkülə çevrilib. Saysız-hesabsız idarəçi, baş məşqçi və futbolçu dəyişiklikləri olsa da, ümumi vəziyyət dəyişmir ki, dəyişmir.

Vaxtilə “Neftçi”nin ən bacarıqlı futbolçularından olan Cavid İmamverdiyev Sportinfo.az-a açıqlamasında komandanın uğurlü günlərini qaytarması üçün çıxış yolunu göstərib:

“Şəxsi fikrimi deyirəm. “Neftçi” əvvəlki əzəmətini qaytarmaq üçün kluba Sadıq Sadıqov, Tahir Süleymanov və Güloğlan Cabbarov gəlməlidir. Məhz bu idarəçilər komandanı düşdüyü vəziyyətdən çıxara bilərlər.

Bu insanlar “Neftçi” üçün canlarını verirdilər, gecələri yatmırdılar. O dönəmdə komandada olanlar dediklərimin canlı şahidi olublar.

İstənilən futbolçudan soruşa bilərsiniz. “Neftçi”nin illərdir davam edən problemi idarəçiliklə bağlıdır. Bu problem aradan qalxsa, azarkeşləri sevindirən nəticələr olacaq”.

Sadıq Sadıqovun prezident, Tahir Süleymanovun vitse-prezident olduğu 2009-2014-cü illər aralığında bakılılar 3 dəfə ölkə çempionu olub, 2 dəfə Azərbaycan kubokunu qazanıb, ölkə futbolu tarixində ilk dəfə Avropa Liqasında iştirak edib.

HƏBİB