Premyer Liqanın 7-ci turunun əsas qarşılaşması “Zirə”də oynanılacaq.

Turnir cədvəlinə liderlik edən meydan sahibləri cari mövsümdə etdiyi transferlərlə adından söz etdirən “Neftçi”ni qəbul edəcək.

Əslində oyun “Neftçi Arena”da keçirilməliydi. Lakin sözügedən stadionun ot örtüyü yararsız vəziyyətə düşdüyündən matç qəsəbədə baş tutacaq.

Oyunun yekun nəticəsi hər iki tərəf üçün vacibdir desək, yanılmarıq. “Qartallar” çempionatın startından bu yana keçirdiyi 6 oyunun 5-ni qalib başa vurub və yalnız “Qəbələ”yə boyun əyib.

“Zirə” bu görüşlərdə çempionluğa əsas namizəd göstərilən “Qarabağ”la “Sabah”ı meydandan məğlub yola salıb. “Neftçi” də iddiası böyük olan rəqiblərdəndir.

Rəşad Sadıqovun drujinası əvvəlki görüşlərdəki qələbələrin təsadüf olmadığını sübut etmək və lider kürsüsündəki yerini bərkitmək üçün “Neftçi”ylə qarşılaşmada da iddiasını ortaya qoymalıdır.

Mümkün qələbə “Zirə”nin təsadüfi qələbələri ilə bağlı deyilənləri alt-üst edəcək, bu komanda haqda müsbət fikirlər yaradacaq.

Bu baxımdan “Neftçi” durumu kifayət qədər ağırdır. Mövsümün əvvəlindən bu yana 10 rəsmi oyun keçirən və bu qarşılaşmalardan yalnız “Jelezniçar”la Bakıdakı dueldə sərgilənən oyuna görə alqışları haqq edən bakılılar çempionatda mümkün 18 xaldan 8-ni aktivinə yazmağı bacarıb.

Bu matçı Adrian Mutu üçün dönüş nöqtəsi hesab edə bilərik. Əldə olunacaq qələbə “ağ-qaralar”ı sözün hər mənasında yuxarıya daşıyacaq.

Həm turnir cədvəli, həm də əhval-ruhiyyə baxımından. “Neftçi” qalib gəlsə, “3-lük”dəki kollektivlərdən birinə çevrilə bilər.

Yox, məğlub olsa, vəziyyət lap çətinləşəcək ki, son pillələrdəki rəqibləri ilə xal fərqi azala bilər.

Üstəlik, bu komandanı ilk dövrənin son 2 turunda “Turan Tovuz” və “Qarabağ”la ağır oyunlar gözləyir. Zirədəki məğlubiyyət çətin görüşlər öncəsi ağır fəsadlara yol aça bilər.

Bir sözlə, turun mərkəzi qarşılaşması bir çox suallara aydınlıq gətirəcək. Və ən əsası, Adrian Mutu ilə Rəşad Sadıqov kimi iddiası yüksək məşqçilərin taktiki duelini və texniki zonadadakı davranışlarını izləmək hər kəsə zövq verəcək. Diqqətlər daha çox bu iki şəxsdə olacaq.

Sentyabrın 23-də Zirə İdman Kompleksində baş tutacaq “Zirə” – “Neftçi” qarşılaşması saat 20:30-da başlayacaq.

HƏBİB