“Qarabağ”ın legioneri Yassin Benzia Sportinfo.az-a müsahibə verib.

29 yaşlı yarımmüdafiəçi “Turan Tovuz” üzərindəki qələbədən sonra (4:1) sualları cavablandırıb.

- Əlcəzair millisinin düşərgəsindən qayıdan sonra özünü necə hiss edirsən?

Hər şey əvvəlki kimidir, Əlhəmdülillah. Bir az yorğunluq var, bu da normaldır. Ancaq Tovuza gəlmişəmsə, deməli, ciddi problem yoxdur.

- Meydana son saniyələrdə daxil olmağın millidən qayıtmağınla bağlı idi, yoxsa süni örtük amilinə görə?

Baş məşqçinin qərarlarına görə “niyə” sualını vermirəm. Mənim işim tapşırıqlara əməl etməkdir. Bu sualın ən doğru cavabını Qurban Qurbanov bilir.

- Turnir cədvəlində ən yaxın izləyiciniz “Zirə”dir. Bu komanda “Qarabağ”ın çempionluğuna mane ola bilər?

Bayaq da dediyim kimi, futbolda sabah nə olacağını heç kim bilmir. Bu, o deməkdir ki, hər şey mümkündür. Çempionluq üçün çox yaxşı şansımız var. Və növbəti həftə rəqibimiz “Zirə”dir. Bu oyunda qələbə qazansaq, çempionluq yolunda böyük addın atmış olacağıq.

- Kadi Borgesin “Qarabağ”a dönüşündən sonra əhval-ruhiyyəndə dəyişiklik hiss edirsən?

Nə mənada?

- Ki, Kadi optimal formasını yığandan sonra ehtiyatda qala bilərsən, daha az şans qazanarsan.

Kadi gələnə qədər ehtiyatda qalırdım, yoxsa yox?

- Xeyr.

Deməli, mən hər zaman hazıram. “Qarabağ”a kim gəlirsə, bu, komandanın xeyrinədir. Rəqabətdən çəkinmirəm, əksinə, onu sevirəm. Xoşbəxtliyim ondadır ki, bir neçə mövqedə oynamağı bacarıram. Baş məşqçi hansı mövqedə güvənsə, buna hazıram.

HƏBİB