“Qarabağ”ın qapıçısı Mateuş Koxalski Sportinfo.az-a müsahibə verib.

Polşalı qapıçı Premyer Liqanın 28-ci turunda “Turan Tovuz” üzərində qazanılan 4:1 hesablı qələbədən sonra sualları cavablandırıb.

- Cari mövsümdə məğlub edə bilmədiyiniz rəqib üzərində bu hesabla qalib gəlməyin həzzi necədir?

- “Turan”a qarşı oynamaq həmişə çətindir. Bu komanda fiziki cəhətdən güclü futbolçulara sahibdir. Xüsusən ucaboylu oyunçularından ehtiyatlanmaq lazımdır. Hər matçda standart vəziyyətlərdən təhlükə yaradır, qollar vururlar. Bu gün də kornerdən fərqləndilər. Böyük hesablı qələbəyə baxmayaraq, çox çətinlik çəkdik. Bu cür qalibiyyətə görə təbii ki, sevincliyəm.

- Bir çox futbolçularınız milli komandalardan qayıtmışdı, üstəlik, sizə xoş olmayan süni örtükdə oynayırdınız. Hədəfə çatmaq üçün əvvəlki görüşlərlə müqayisədə nələri dəyişmişdiniz?

- Meydanda hər şey həmişə etdiklərimiz idi. Ən vacibi olan mental məsələ idi ki, bu problemi həll etməyi bacardıq. Nə “sintetika”ya önəm verdik, nə də rəqibin hansı keyfiyyətlərdə üstün olması. Bütün diqqəti öz oyunumuza ayırmaqla hədəfə çatdıq.

- Əvvəlki qarşılaşmalarda qalib gələ bilməməyiniz xüsusi motivasiya, qisas hissi yaradırdı?

- Əlbəttə. Sona qədər belə davam edə bilməzdi. Yadınızdadırsa, yanvardakı oyunda son saniyələrdə buraxdığımız qola görə uduzmuşduq.

- Buraxdığın qoldakı səhvi nə ilə əlaqələndirə bilərsən?

- Düzgün mövqe seçmişdim. Topu görsəydim, müdaxilə edəcəkdim. Lakin top cərimə meydançasına havalandırılan anda projektorun işıqları gözümə düşdü deyə, hədəfi itirdim.

HƏBİB