“Şamaxı”nın qış fasiləsində heyətinə qatdığı Vladislav Veremeyev Sportinfo.az-a müsahibə verib.

26 yaşlı ukraynalı müdafiəçi “Kəpəz”lə heç-heçə başa çatan (1:1) oyundan sonra matçla və özü ilə bağlı sualları cavablandırıb.

- Səfərdən xalla qayıtsanız da, futbolçuların çoxu üzgün görünür. 1:1 qanr etmədi sizi?

- Bura qələbə dalınca gəlmişdik və deyim ki, hədəfə çox yaxın idik. Əvvəldən sonra qədər 3 xal üçün mübarizə apardıq, yaxşı qol imkanlarımız da oldu. Eybi yox, bu gün 1 xalla kifayətlənib, növbəti oyunlara hazırlaşmalıyıq.

- “Şamaxı” penaltidən fərqlənəndən az sonra vurduğunuz avtoqol nəticəsində hesab bərabərləşdi. Nə baş verdi?

- Bu qədər zəhmətin qarşılığında o cür qol buraxmaq təbii ki, üzücüdür. Rəqib o qolu haqq etmirdi, biz hədiyyə etdik. Adi vəziyyətdə top futbolçularımızdan kiməsə dəyib (Rüfət Abbasov – H.) qapıdan keçdi. O qol olmasaydı, matçın axarı başqa cür ola bilərdi.

- Sanki avtoqol komandanı “sındırdı”.

- Xeyr-xeyr, belə deməzdim. Əksinə, bizi daha da məsuliyyətli olmağa çağırdı. Üzülmədik, sona qədər mübarizə apardıq, gördüyünüz kimi, sona yaxın əla qol imkanlarımız oldu. Çünki bura 3 xal dalınca gəlmişdik, başqa nəticəni düşünmürdük.

- Öz çıxışını necə dəyərləndirirsən?

- Bu barədə baş məşqçimiz danışa bilər. Çünki kənardan baxan, qiymət verən odur. Tapşırıqlarını nə dərəcədə doğru-düzgün yerinə yetirdiyimə dair fikir baş məşqçiyə məxsusdur.

- Sən öz oyunundan razısan?

- 100 faiz razı qaldığımı deməzdim. Çünki hələ ki, tam istədiyim kimi deyiləm və daha artığını bacaracağıma əminəm. Zaman keçdikcə, möhitə öyrəşdikcə, növbəti matçlarda daha yaxşı çıxış edəcəyimə inanıram.

HƏBİB