"Sumqayıt"ın prezidenti Riad Rəfiyev Premyer Liqanın 18-ci turunun "Kəpəz"lə bərabərə bitən (0:0) matçdan sonra Sportinfo.az-a müsahibə verib.

- Belə çətin oyun keçəcəyini gözləyirdiz?

- Ağır oyun olacağını əvvəldən bilirdik. Həm süni meydan, həm də səfərdə oyun keçirmək asan deyildi. Bir də qış fasiləsi öncəsi son matç olmasını nəzərə almaq lazımdır. Futbolçular çemodan əhval-ruhiyyəsində idi.

- Bəs yekun nəticə sizi qane etdi?

- Əlbəttə, bütün bunlara rəğmən qələbə dalınca gəlmişdik, amma alınmadı. Lakin təslim olmamalı, yolumuza davam etməliyik.

- Mövsümün birinci yarısını necə qiymətləndirirsiniz?

- Burada gizlədiləsi nəsə yoxdur. Komanda mövsümə çox pis başladı. İkinci dövrədə nisbətən özümüzə gəldik. Amma bundan da yaxşı oynamalıyıq. Sona kimi mübarizə aparacağıq.

- Komanda Konfrans Liqasında iştirak edəcəyi üçün hazırlığa erkən başlamışdı. Digər rəqiblərlə müqayisədə bunu üstünlük saysaq, məntiqlə uğurlu start gözləmək olardı. Nə mane oldu?

- Təəssüflər olsun ki, aparıcı futbolçularımızı yayda itirdik. Məncə, əsas səbəb bu idi. Daha yaxşı futbol oynaya biləcəyimizi düşünürəm. İnanıram ki, yeni ildə daha yaxşı olacağıq.

- Yeni ildə daha yaxşı olacaq fikrini yeni transferlərin mesajı kimi qəbul etmək olar?

- Bəli, güclənəcəyik. Yeni transferlər olacaq.

- Danışıqların getdiyi kimlərsə var?

- Bəli, hazırda danışıqlar gedir.

- Yerli, yoxsa əcnəbi?

- Əcnəbi oyunçular olacaq.

- Vaqif Cavadovun üzərindən müvəqqəti baş məşqçi statusu nə vaxt götürüləcək?

- Bu barədə yaxın zamanlarda rəsmi məlumat olacaq.

XANOĞLAN İMANOV