Premyer Liqada 12 oyundur məğlubiyyətin nə olduğunu bilməyən “Araz-Naxçıvan” bu dəfə “Sumqayıt”a yerini göstərdi – 1:0.

Naxçıvan təmsilçisinin düşərgəsində bir çal-çağır var idi ki, gəl görəsən.

Komandanın portuqaliyalı “10 nömrə”si Bernardo Dias (Benni) Sportinfo.az-a verdiyi müsahibədə komandası ilə bağlı sualları cavablandırdı.

- Oyunun belə keçəcəyini təxmin edirdin?

- Mübarizlik sayəsində hədəfə çatmağı bacardıq. Lakin bu, “Araz-Naxçıvan”ın maksimumu deyil. Son 2 həftədə 5 oyun keçirməyimiz müəyyən mənada özünü göstərirdi. Nə qədər yorğun olsaq da, məqsədimiz 3 xalı əldə etmək idi. Bu şəkildə davam etməliyik.

- Bu qələbə sayəsində turnir cədvəlində birinci pilləyə yüksəldiniz. “Qarabağ” “Zirə”ni uda bilməsə, azı iki həftə lider olacaqsınız. Bu fakt sizə nə dərəcədə motivasiya verir?

- Çempionat hələ yarılanmayıb. Qarşıda o qədər oyunlar olacaq ki. Ona görə də turnir cədvəlinə xüsusi önəm verməyin mənası yoxdur. İndiki mövqeyimiz gələcək üçün heç nə vermir. Önəmli olan yekunda yaxşı yerlərdən birini tutmaqdır. Məqsədimiz tutduğumuz xətt üzrə layiqincə davam etməkdir.

- Mövsümün sonunda medal qazanmaq realdır, səncə?

- Mümkünsüz heç nə yoxdur. Çox yaxşı komandaya sahibik, mehriban kollektivimiz var. Bu şəkildə davam etməklə çox şeylər edə bilərik. Ayaqlarımız sınsa da, meydanda can qoymalıyıq.

- “10 nömrə” olsan da, 13 oyunun cəmi 6-da əsas heyətdə yer almısan. Narahatlıq var?

- Mənim üzərimə düşən iş məşqlərdə səylə çalışmaq, baş məşqçi şans verəcəyi halda komandam üçün faydalı olmaqdır. Bunların hamısını əzmlə edirəm. Hansı oyunda “11-lik”də, hansı matçda ehtiyatda başlayacağıma dair qərar baş məşqçimizə məxsusdur. “Araz-Naxçıvan” qələbə qazanırsa və bu gün üst pillələrdəyiksə, heç nədən narahat deyiləm. 90 dəqiqə oynadım, ya da 20 dəqiqə - fərq etmir. Önəmli olan komandamızın uğur qazanmasıdır.

HƏBİB