“Turan Tovuz”un yarımmüdafiəçisi Serrano Qarsiya Sportinfo.az-a müsahibə verib.
İspaniyalı legioner ölkəmizə gəlişi, burdakı həyat tərzi və gələcək planlarından danışıb.
- Azərbaycana gəlişin necə baş tutdu?
- Azərbaycanlı agent Erkin İbrahimov bizimlə əlaqə saxlayıb, klubun təklifini göndərmişdi.
- Azərbaycanı təklifə kimi tanıyırdın?
- Xeyr. Mən heç vaxt burada olmamışam
- Burada çoxlu sayda ispaniyalı futbolçular oynayıb. Arasında məsləhət aldığın kimsə oldu?
- Bəli. İllər əvvəl mənimlə “Selta”da oynamış Manalito Appehlə (“Sabah”ın legioneri) danışdım.
- Maraqlıdır, ilk sözləri nələr oldu?
- Salam aleykum (gülür).
- Ölkə haqqında nələr dedi?
- Gözəl ölkə olduğunu bildirdi. Yaşayış səviyyəsi yüksək olan şəhərdir. Bir az xaotik və yayda çox isti, lakin yaşamaq üçün yaxşı şəhər olduğunu dedi.
- Azərbaycan futbolu haqqında ilkin təəssüratların necədir?
- Burada fiziki rəqabət yüksəkdir. Mənim olduğum liqalardan fərqli olaraq burada cəmi 10 komanda var və hər komandaya qarşı 4 dəfə oynayırsan. Amma rəqabətin səviyyəsi yaxşıdır.
- “Turan”a gəlmək qərarına əsas təsir edən nə oldu?
- Erkin bəy bir neçə ay idi mənimlə əlaqə saxlayırdı. Klubun mənimlə müqavilə imzalamaqda israr etməsi və komandada vacib oyunçu olacağımı göstərməsi qərarıma birbaşa təsir etdi.
- Bir Aydan bir qədər artıq zamandı burdasan. Qərarından razısan?
- Əlbəttə!
- Təmsil olunduğunuz Tovuz paytaxtdan uzaqdadır. Orada qalmaq sıxıcı deyil?
- Biz Bakıda yaşayırıq. Tovuza ancaq ev oyunları üçün gedirik.
- Karyeranda çox klub olub. Tez-tez yer dəyişdirməyi özün xoşlayırsan?
- Uzun illər bir yerdə olmaq imkanı mənə verilməyib. Mən də yeni imkanlar və çağırışlar axtarışında olaraq yerləri dəyişdirmək məcburiyyətində qalmışam.
- Azərbaycan mətbəxinə münasibətiniz necədir?
- Bir neçə restoranda oldum, amma ölkənin öz mətbəxinə aid xüsusi heç nə yox idi.
- Deməli, bütün əcnəbilərin sevdiyi kababı hələ yeməmisiniz…
- Hələki yox. Amma mütləq dadına baxacam (gülür).
- Yerli əhali haqqında nələr deyə bilərsiniz?
- Çox yaxşı və yardımsevər insanlardı. Hər an kömək etməyə çalışırlar.
- Ölkəmizə tam uyğunlaşdığını demək olarmı?
- Bəli.
- Meydanda olduğun görüşlərdəki performansından razısan?
- Xeyir, mənim əsl səviyyəm indiyə qədər göstərdiklərimdən yaxşıdır.
- Əsl səviyyəni göstərməyə nə mane olur?
-Komandaya gec gəldim və mövsümöncəsi hazırlıqda iştirak etmədim.
- O zaman biz daha yaxşı Serranonu nə vaxta görə bilərik?
- Tezliklə baş verəcəyinə ümid edirəm.
XANOĞLAN İMANOV
