İyunun 9-da DÇ-2026-nın seçmə mərhələsinə Şimali Makedoniya ilə oyunla start verəcək Qazaxıstan millisi ondan üç gün əvvəl yoldaşlıq görüşündə qüvvəsini sınamaq niyyətindədir.
Sportinfo.az saytı xəbər verir ki, şimali makedonları Astanada qəbul edəcək Alı Alıyevin yetirmələrinin Azərbaycan millisi ilə qarşılaşmaq ehtimalı olub.
Belə ki, Qazaxıstan Futbol Federasiyası bununla bağlı bir müddət əvvəl AFFA-ya müraciət edib. Qazaxlar Fernandu Santuşun kollektivini doğma arenada qəbul etmək niyyətində olublar.
Hətta qurumlar arasında ilkin danışıq da aparılıb. Lakin sonradan razılıq əldə olunmayıb. Nəticədə AFFA başqa variantlar üzərində dayanıb, Latviya və Macarıstan yığmaları ilə yoldaşlıq görüşünə nail olub.
Millimiz iyunun 7-də Riqada Latviyanın qonağı olacaq, 10-da isə evdə Macarıstanı qəbul edəcək.
