Ukrayna millisinin qapıçısı Anatoli Trubin DÇ-2026-nın seçmə mərhələsindəki şanslarını dəyərləndirib.
Sportinfo.az xəbər verir ki, “Benfika”nın 23 yaşlı qolkiperi Fransanın bu qrupa düşməsinin onların işini çətinləşdirəcəyini etiraf edib.
Lakin o, qrup birinciliyi uğrunda mübarizə aparmağın vacibliyini vurğulayıb:
“Yenə ikinci yerdə olacağıq? Bu, bizim düzgün olmayan düşüncəmiz, mentalitetimizdir.
Hər oyuna ayrıca yanaşmaq lazımdır. Fransa ilə əvvəlki matçlarımızı hamımız xatırlayırıq.
Onlara qalib gəldiyimiz və heç-heçə etdiyimiz vaxtlar da olub. Buna görə də düzgün köklənmək lazımdır.
Hər qarşılaşma yenidir, istənilən rəqibə qalib gəlmək olar”.
Trubin rəqiblər barədə danışarkən Azərbaycan millisindən bəhs etməyə ehtiyac duymayıb:
“Fransanın səviyyəsinə bələdik, çox çətin olacaq. Ancaq düşünürəm ki, hər şey mümkündür, sentyabra qədər hələ vaxt var.
Çox maraqlı olacaq. İslandiya ilə də çətin oyun keçirmişik. Bu üzdən heç bir komandaya qarşı asan olmayacaq.
Qruplarda yer alan bütün komandalar dünya çempionatına vəsiqə qazanmaq və ölkəsini mundialda təmsil etmək istəyir”.
DÇ-2026-nın seçmə mərhələsinin D qrupunda mübarizə sentyabrda başlayacaq. Azərbaycan millisi II tur çərçivəsində sentyabrın 9-da Ukraynanı qəbul edəcək.
