DÇ-2026-nın seçmə mərhələsinin Avropa zonasının püşkatması Azərbaycan millisini tanış rəqiblərlə üz-üzə qoyub.

Sportinfo.az xəbər verir ki, yığmamız 2025-ci ilin payızında qarşılaşacağı komandaların hər biri ilə əvvəllər də görüşüb.

Rəqibimiz olduğu dəqiqləşən iki komanda – Ukrayna və İslandiya yalnız yoldaşlıq görüşlərində qarşımıza çıxıb.

Millətlər Liqasının 1/4 final mərhələsinin Fransa – Xorvatiya cütündən isə yalnız qalib tərəf millimizlə görüşəcək. Bu mümkün rəqiblərin hər ikisi Avropa çempionatlarının seçmə mərhələlərində yığmamızla qarşılaşıb.

Millimiz bu 4 rəqiblə ümumilikdə 9 matç keçirib. Komandamız hələ qələbə qazanmayıb.

Oser faciəsinin yaşadanlar
Fransa millimizin beynəlxalq arenadakı debütündə rəqibimiz olub. AVRO-1996-da yığmamız Bakıda oynamadığı üçün Trabzonun qonağı olan “üçrənglilər” iki cavabsız qolla qələbə qazanıb. Oserdəki görüş isə futbolumuzun tarixinə ləkə kimi düşüb. “Oser faciəsi” və ya “qapıçı aparmamışdıq” kimi tanınan görüşdə yığmamız tarixinin ən ağır məğlubiyyətini alıb. Heç vaxt Bakıda olmayan Fransa ilk dəfə ölkəmizin qonağı ola bilər.

AVRO-1996-nın seçmə mərhələsi
13 dekabr 1994. Trabzon. AÇ. Azərbaycan – Fransa - 0:2
6 sentyabr 1995. Oser. AÇ. Fransa – Azərbaycan - 10:0

Bakıda xal itirənlər
Fransadan fərqli, Xorvatiya artıq iki dəfə Bakının qonağı olub. Hər iki seçmə mərhələnin ev oyununda millimiz xal qazanıb. Bakıda xal itirən xorvatiyalılar öz meydanlarında qələbə qazanıblar. İlk belə qələbə Berti Foqtsun istefası ilə nəticələnəcək darmadağınla yadda qalıb.
AVRO-2016-nın seçmə mərhələsi
13 oktyabr 2014. Osiyek. AÇ. Xorvatiya - Azərbaycan - 6:0
3 sentyabr 2015. Bakı. AÇ. Azərbaycan – Xorvatiya - 0:0
AVRO-2020-nin seçmə mərhələsi
1 mart 2019. Zaqreb. AÇ. Xorvatiya - Azərbaycan - 2:1
9 sentyabr 2019. Bakı. AÇ. Azərbaycan - Xorvatiya - 1:1

Şübhəli məğlubiyyət və sülh
Ukrayna və İslandiya ilə yalnız yoldaşlıq oyunları baş tutub. Sonuncularla yeganə qarşılaşma Reykyavikdə təşkil olunub.

Millimiz soyuq səfərdən qollu heç-heçə ilə dönüb. Elə Ukrayna ilə də ilk tanışlıq sülhlə bitib. Amma Bakıdakı görüş qolsuz bitib.

Ukraynada isə... İndiyədək müzakirə olunan, müəyyən şübhələrə əsas verən yoxlama görüşündəki darmadağından sonra millidə ciddi islahatlar aparılıb.

Şahin Diniyev bir qrup futbolçunu millidən kənarlaşdırıb və legionerin milliləşməsinə yeni təkən verib (idman.biz).

28 fevral 2006. Bakı. YO. Azərbaycan – Ukrayna - 0:0
15 avqust 2006. Kiyev. YO. Ukrayna – Azərbaycan - 6:0
20 avqust 2008. Reykyavik. YO. İslandiya - Azərbaycan - 1:1