Gəncə şəhər stadionunun tikintisi tam sürətlə davam etdirilir.

Böyük işçi qüvvəsinin səfərbər olunduğu arenada artıq tribunaların inşası son mərhələyə yaxınlaşmaq üzrədir.

Azərbaycan Respublikasının Prezidenti İlham Əliyev 2024-cü ilin aprelin 9-da Gəncə şəhər stadionunun təməlini qoyub.

1959-1963-cü illərdə inşa edilən Gəncə şəhər stadionu 1964-cü ildə istismara verilib.

Son illərdə stadionun tamaşaçı tribunaları yararsız vəziyyətə düşdüyündən və texniki cəhətdən istismarı mümkün olmadığından fəaliyyəti qismən həyata keçirilirdi. Stadionun ərazisində köməkçi məşq meydançaları və futbol akademiyası binası tikilib.

Azərbaycan Respublikası Prezidentinin 2023-cü il 6 oktyabr tarixli Sərəncamına əsasən, Gəncə şəhər stadionunun yenidən qurulması işlərinin layihələndirilməsi və həyata keçirilməsi üçün Prezidentin ehtiyat fondundan ilkin olaraq bir milyon manat ayrılıb.

Yenidənqurma işləri çərçivəsində stadionun ərazisi genişləndirilərək 10 hektara çatdırılacaq. UEFA-nın 4-cü kateqoriya standartlarına uyğun inşa ediləcək qurğunun tamaşaçı tutumu layihə üzrə 15 min 464 yerlikdir.

Stadionda VVIP, VIP, SKY-box, media nümayəndələri və fiziki imkanları məhdud tamaşaçılar üçün müvafiq sayda oturacaq sahələri, futbolçular üçün soyunub-geyinmə, konfrans, tibb, hakimlər, texniki heyət üçün otaqlar və sair zəruri sahələr nəzərdə tutulur.

Eyni zamanda, layihəyə əsasən stadionun daxilində bilet satışı, eləcə də müxtəlif ictimai iaşə obyektləri, yerüstü avtodayanacaqlar, nəzarət-buraxılış məntəqələri yaradılacaq.

Stadion UEFA tələblərinə uyğun işıqlandırma, səs, yayım, internet, təhlükəsizlik, giriş-çıxış sistemləri ilə təchiz olunacaq. Bir sözlə, stadionun istifadəyə verilməsi istər yerli, istərsə də beynəlxalq yarışların keçirilməsinə hərtərəfli şərait yaradacaq.

Arena bu ilin avqustuna qədər hazır olmalıdır. Hər halda MDB Oyunlarının açlış və bağlanış mərasimlərinin bu stadionda keçirilməsi nəzərdə tutulub.

Gənclər və idman naziri Fərid Qayıbov yaxınlarda Gəncəyə səfər edib, görülən işlərlə yerində tanış olub.

Podratçı şirkətin nümayəndələri ona bildirib ki, artıq apreldə meydana toxum səpiləcək. Təhvil-təslim avqustun əvvəlinədək çəkəcək.

SPORTİNFO.AZ