“Kəpəz” Şamaxı səfərində qazandığı qələbə ilə sonuncu pillədən qurtuldu.

Matç başa çatandan sonra gəncəlilərin paltardəyişmə otağında bir vur-çatlasın var idi ki, gəl görəsən.

Son vaxtlar əsas heyətdə görməyə alışdığımız Nicat Süleymanov Sportinfo.az-ın suallarını həvəslə cavablandırdı.

- Vacib oyunda qələbə qazanmaq üçün nə etdiniz?

- Meydanda can qoyduq. Bilirdik ki, qələbə bizi sonuncu pillədən xilas edəcək. Bunu düşünərək hamı bir nəfər kimi döyüşdü və yekunda 3 xal qazandıq.

- Bu oyunu “Kəpəz” üçün dönüş nöqtəsi saymaq olar?

- Fikir verirsinizsə, hər ötən gün komandamız daha yaxşı çıxış edir. Analizlər zamanı bu, aşkar görünür. Dönüş etməyi bacardıq, önəmli olan bu tempi daha da artırmaqdır.

- Sonunculuqdan qurtuldunuz. Bundan sonrakı hədəf nədir?

- Bu, başlanğıcdır. Qarşıda bizi çox sınaqlar gözləyir. Uğurlu nəticələr qazanmaqla irəli getməyə çalışacağıq. Nə qədər mümkün olacaqsa, bir o qədər irəliləyəcəyik. Əsas olan sonuncu yerdən çıxmaq idi.

- Əvəzləndiyin epizodda “Şamaxı”nın futbolçuları ilə yaşadığın münaqişənin səbəbi nə idi?

- Futbolda belə hallar olur. Kiçik anlaşılmazlıq idi, oldu keçdi, meydanda qaldı. Oyunun gərginliyindən doğan epizod idi. Xüsusi nəsə baş verməmişdi.

- Georgi Kantariya ilə “Kəpəz”də komanda yoldaşı olmusunuz. Hətta onunla da sözün düz gəlmirdi. Oyun başa çatandan sonra da xeyli söhbət etdiniz.

- Kantariya oyun gedə-gedə də mənimlə zarafat edirdi. “Kəpəz”də bir yerdə oynamışıq, münasibətlərimiz yaxşıdır. Bəlkə də kənardan kobudluq kimi görünüb, amma elə deyil. Sadəcə, zarafat edirdik.

HƏBİB