«Neftçi»yə 4 qol vuran komandanın eyni məkanda «Qarabağ»dan 5 top buraxması…
Düzü, «Kəpəz»in liderə məğlubiyyətini gözləyirdim.
Amma həm yaxşı oynayıb, həm də daha açıq fərqlə uduzması gözlənilməz oldu mənim üçün.
Tovuz stadionunun tablosunu alabəzək edən «qol yağışı» təcrübə ilə səhlənkarlığın qarşıdurmasından əmələ gələn mənzərədir.
«Kəpəz» uduzmaq üçün meydana çıxmamışdı. Heyətdəki müəyyən itkilərə rəğmən, görsənirdi ki, Azər Bağırov bəxtini sınamaqdan ötrü hər riskə gedib, hazırdır.
Fasiləyə kimi canfəşanlıq göstərdilər, top saxladılar, 3-4 ardıcıl ötürmə etdilər, elliklə qapının ağzına doluşmadılar. İlk 45 dəqiqə komandanın fiziki cəhətdən nisbətən artırmasının da nümayişi oldu.
İkinci yarının əvvəlində Luis Paçunun qapıçrıdığı o qol epizoduyla birgə «Kəpəz» də batdı. Lap Aşqabad batan kimi.
Yeqor Xvalkonun yeri göründü. Belaruslu kapitanın yoxluğunda İlkin Qırtımovu məcburiyyətdən mərkəzinə çəkən baş məşqçinin oyuna başqa müdaxilə imkanı olmadı.
Ehtiyat skamyanın boyu qısa olandan sonra nə edəsən: daha müqavimət göstərə bilmirsənsə, otur səhnədən, olanlardan həzz al.
Bu, hər dəfə belə olmayacaq. Əksini də görəcəyik.
Məncə, Azər Bağırov fikrindən vaz keçməməlidir yenə. Bu oyun tərzi «Kəpəz»i qaldığı yerdən tərpədəcək, irəli aparacaq.
Nə olsun, «Qarabağ»dır bu, heç bir rəqibdən çəkinmək lazım deyil. Sən öz oyununu tapmısansa, oyna, nəticə də gələcək.
MUSA