“Milan”ın hücumçusu Rafael Leao komandanın yeni baş məşqçisi Serjio Konseysao haqda fikirlərini bölüşüb.
Portuqaliyalı çalışdırıcı dekabrın sonunda qovulan Paulo Fonsekanı əvəzləyərək, “Milan”ın başına keçib.
Sportinfo.az “La Gazzetta dello Sport”-a istinadən xəbər verir ki, portuqaliyalı futbolçu, Konseysaonun çox zarafat etmədiyini bildirib:
“Konseysaonun gəlişi mentalitetimizə təsir etdi və enerji gətirdi. Hamımız üçün çox vacib olan superkuboku qazandıq.
Konseysao çox zarafat etmir, amma o, məni necə motivasiya edəcəyini bilir və bu, mənə növbəti səviyyəyə çatmağa kömək edəcək.
Baş məşqçini dinləməyə və onun ideyalarını izləməyə hazıram. Onunla biz dərhal kuboku qazandıq və o, böyük nailiyyətlərə qadir olduğunu artıq sübut etdi.
İndi biz qələbələri davam etdirmək və A Seriyasının ilk dördlüyünə düşmək üçün mübarizə aparmaq istəyirik”.
“Milan” yeni baş məşqçinin rəhbərliyi altında artıq İtaliya superkubokunu qazanmağı bacarıb.
