Azərbaycanın qadınlardan ibarət həndbol millisi 2024-cü ildə təşkil olunacaq Avropa çempionatının seçmə mərhələsi çərçivəsində Litva ilə səfər matçına baş məşqçisiz çıxıb.

Sportinfo.az xəbər verir ki, bunu "report"a açıqlamasında millinin çalışdırıcısı Aleksandr Revva özü bildirib.

"Mən Litvadakı oyunda iştirak edə bilmədim. Litva mənə viza vermədiyi üçün komandanı oyuna ikinci məşqçi çıxardı. Rəqib meydançaya yüksək əhval-ruhiyyədə çıxmışdı. Onlar Bakıdakı məğlubiyyətin əvəzini çıxa bildilər. Komandam ilk dəqiqələrdən matça yaxşı başlamadı. Əsas oyunçumuz Kamilə Bayramova da iki dəfə 2 dəqiqəlik meydandan qovuldu. Nəticədə 38-ci dəqiqədə üçüncü dəfə cəzalanan Bayramova qırmızı vərəqə aldı. O, bizim əsas oyunçumuzdur və onsuz komandaya çox çətin oldu", - deyə Aleksandr Revva vurğulayıb.

Rusiyalı mütəxəssis qarşıdakı matçlarda azarkeşləri sevindirmək niyyətində olduqlarını diqqətə çatdırıb: "Həndbolçular Litvada qələbə qazanmaq istəyirdilər, amma Bakıdakı uğuru təkrarlaya bilmədik. Seçmə mərhələ çərçivəsində qarşıda iki oyunumuz var. Evdə Şimali Makedoniya, səfərdə İspaniya yığmaları ilə üz-üzə gələcəyik. Bakıdakı oyunda Şimali Makedoniyanı məğlub etməyə çalışacağıq. İspaniya kimi Avropanın aparıcı həndbol yığmasını üstələmək isə çox çətin olacaq".

Azərbaycan millisi Bakıda Litvaya 35:33 hesabı ilə qalib gəlsə də, səfərdə bu rəqibinə uduzub - 26:41. 5-ci qrupda yer alan komandamız daha əvvəl Şimali Makedoniya (17:40) və İspaniyaya (18:38) məğlub olub.