Azərbaycan Kubokunun yarımfinal mərhələsinin “Neftçi” – “Sabah” oyunundan öncə gərginliyin qoxusu gəlirdi.

Hər iki komandanın əsas ümidini kuboka dikməsi bu matçda bizi amansız mübarizənin gözlədiyindən xəbər verirdi.

Bu imtahandan təkcə baş məşqçilər, futbolçular yox, meydandakı ədalət təmsilçiləri də üzüağ çıxmalıydılar. Hadisələrin gedişatının heç də yaxşı nə isə vəd etmədiyi görünürdü.

Bu barədə yazıda da xüsusi vurğulamışdıq. lhttps://www.sportinfo.az/idman_xeberleri/sabah/218025.html).

Çox təəssüf ki, bu dəfə də hakimlik oyunun önünə keçdi. Oysa ki, bu matça ən tərifli FİFA referimiz Əliyar Ağayev təyinat almışdı.

Belə bir deyim var- əgər bir oyunda hakimin varlığı ilə yoxluğu bilinmirsə, deməli hakim həmin matçı çox yaxşı idarə edib.

Dünənki “Neftçi” – “Sabah” oyununun əsas qəhrəmanı isə Əliyar Ağaye və onun başçılıq elədiyi hakimlər briqadası idi. Matçda hakimlər bir neçə dəfə diqqət mərkəzinə düşdülər.

Oyunun 49-cu dəqiqəsində meydan sahiblərinin futblçusu Mustafa Sek əks hücum zamanı “Sabah”lı Xəyal Əliyevə qarşı qayda pozuntusu edir.

Baş hakim Əliyar Ağayev cərimə təyin etsə də, Sekə ikinci sarı vərəqəni göstərmir, onu bağışlayır. Lakin baş hakimin meydan sahiblərinə qarşı olan rəhmi bununla yekunlaşmır.

Matçın 91-ci dəqiqəsində “Neftçi”nin müdafiəçisi Yuri Matias Coy-Lens Mikelsi cərimə meydançası daxilində yıxsa da, nə FİFA referimizin fitindən səs çıxır, nə də ki VAR-dakı hakimlərin “monitoru işləmir”.

Maraqlıdır ki, oyunun ilk hissəsində Tellur Mütəllimovun qayda pozuntusunu zərgər dəqiqliyi ilə müəyyənləşdirən Ağayev, bu dəfə heç nə olmamış kimi korner nöqtəsini göstərir.

Oyuna sonradan - 65-ci dəqiqədə daxil olmuş Mikelsin bu zədə səbəbindən əvəzlənməsi də nə baş hakimin, nə də VAR hakimlərinin diqqətini cəlb etmir.

Maraqlıdır ki, adətən belə epizodlarda yayımçı qurum olan “CBC Sport”un çəkiliş keyfiyyətindən narazılıq edən hakimləri telekanalın epizodu bir neçə dəfə - kifayət qədər keyfiyyətli şəkildə ekranlara gətirməsi də ayıltmır.

Nəticədə “Sabah” səfərdə 2:1 hesablı vacib qələbə qazansa belə, cavab oyunu öncəsi bəlkə də qızıl dəyərində olan 3-cü qoldan məhrum edilir.

İndi geriyə boylanıb baxanda istər-istəməz sual yaranır.

Axı necə olur ki, oyundan öncə bizim gördüyümüzü hakimlər görmədi?

Necə oldu ki, göz görə-görə bu cür vacib anda büdrədilər?

Bəlkə də bu, “Neftçi”nin baş məşqçisi Samir Abasovun hakimlər üzərində aşkar qələbəsi idi. Abasov bu oyundan bir neçə gün, hətta həftə əvvəlcədən hakim qərarlarından etiraz etməklə onları bu cür “qərarlar”a və yaxud “qərarsızlığ”a hazırlamışdı.

Bəlkə də Vasili Berezutski hakim qərarlarına etiraz olaraq mətbuat konfransını erkən tərk etmək əvəzinə vaxtında Abasov kimi öz etirazını bildirməli idi.

Amma bu oyun üçün artıq gecdir, sabah gec olacaqmı? Bəlli deyil.

Bəlli olan bir şey var ki, o da dünənki oyunda da əvvəlki “Neftçi” – “Sabah” oyunundakı ssenarinin təkrarlanması idi.

Yenə də qonaqların aşkar penaltisi verilmədi, meydan sahiblərinin ikinci sarı vərəqə ilə cəzalanmalı futbolçusu bağışlandı və yenə meydandakı futbolu yox, ədalət təmsilçilərinin ədalətsiz qərarlarını müzakirə edirik.

Bəlkə də həmişə oxşar situasiyalarda fərqli qərarlar gözləməyimiz bizim ən böyük səhvimizdir.

Bəlkə də hər zaman dəmir hövsələsi ilə rəğbət qazanan Qurban Qurbanovu belə hövsələdən çıxaran hakimlərimizdən çox şey gözləyirik?

Xəlil Sadıq

VİDEONU BU LINKƏ DAXİL OLARAQ İZLƏYİN