İyulun 19-da idman jurnalistlərinin Bakıda yerləşən restoranda bir araya gəlməsi təsadüfi deyildi.

Ölkədaxili yarışların keçirilməsinə və təşkilatçılığına cavabdehlik daşıyan Peşəkar Futbol Liqasının rəhbərliyi 22 İyul – Milli Mətbuat Gününü məhz bu tarixdə bizimlə birlikdə keçirməyi qərara almışdı.

Lakin bu dəfəki məclis bir cəhətinə görə digərlərindən xüsusi şəkildə fərqlənirdi. Bayram planı təkcə yeyib-içib, qol qaldırıb oynamaqdan yox, həm də yaddaşımızı təzələməkdən ibarət idi.

Bunun üçün 55 suallıq intellektual oyun təşkil olunmuşdu ki, 12 komandadan və 11 mərhələdən ibarət viktorinanın yekununda ilk üç yeri tutan komandalar mükafatlandırılacaqdı.

Komandaların adları işğaldan azad olunmuş rayon və şəhərlərin adlarına uyğun hazırlanmışdı.

Bəndənizin də yer aldığı “Xankəndi” komandası 10-cu turun yekununda 3-cü olmaq şansını saxlayırdı. Lakin həlledici mərhələdə büdrəməyimiz yarışı 5-ci sırada tamamlamağımıza səbəb oldu.

“Şuşa” qalib adını qazandı, “Qarabağ Ağdam” ikinci oldu, “Ərgünəş Füzuli” üçüncülüklə kifayətləndi. Mübarizənin sonunda qaliblərə kubok və medallarla yanaşı, pul mükafatları təqdim olundu,

Daim çəkiliş və reportajlarda olan idman mediasını bir araya toplamağı bacaran, maraqlı suallarla yaddaşımızı təzələməyə imkan yaradan Peşəkar Futbol Liqasında göstərilən diqqətə görə ayrıca təşəkkür düşür.

HƏBİB / SPORTİNFO.AZ