Azərbaycan Kubokunun final matçının vaxtı dəyişdirilib.
Peşəkar Futbol Liqası (PFL) bununla bağlı yeni qərar qəbul edib.
PFL-dən saytımıza daxil olan informasiyaya görə, qarşılaşma iyunun 1-də deyil, mayın 31-də keçiriləcək.
Bu, Azərbaycan Minifutbol Federasiyasının (AMF) PFL-ə şifahi formada müraciəti ilə əlaqədardır. Belə ki, AMF iyunun 1-də keçirilməli olan Azərbaycan Kubokunun final matçının vaxtının dəyişdirilməsini istəyib.
Buna səbəb Bakıda təşkil olunacaq minifutbol üzrə dünya çempionatının finalının da eyni günə təsadüf etməsidir. Federasiya PFL-dən kubokun həlledici qarşılaşmasının mayın 31-də, yaxud iyunun 2-də düzənlənməsini xahiş eləyib.
PFL rəsmi qərarını tezliklə açıqlayacaq. Təşkilatçı qurum məkanı olduğu kimi saxlayıb.
Final əvvəlcədən nəzərdə tutulduğu kimi Sumqayıtda - Mehdi Hüseynzadə adına stadionda düzənlənəcək.
SPORTİNFO.AZ
