![31 il sonra kimliyi bilinən şəhid Gəncədə dəfn edildi - FOTOLAR](https://www.sportinfo.az/media/2024/07/19/defnnnn.jpg)
Birinci Qarabağ müharibəsində itkin düşmüş hesab edilən və 31 il sonra şəxsiyyəti müəyyənləşdirilən daşkəsənli şəhid Akif Abbasov dəfn olunub.
Daşkəsən rayonunun Əhmədli kənd sakini şəhid Abbasov Akif İlyas oğlu Gəncə şəhər Şəhidlər Xiyabanında dəfn edilib.
Şəhidin dəfn mərasimində Daşkəsən Rayon İcra Hakimiyyətinin başçısı Orxan Abbasov, Gəncə Şəhər İcra Hakimiyyətinin başçısı Niyazi Bayramov, Türkiyənin Gəncədəki vitse-konsulu Özkan Büktel, rayonun hüquq-mühafizə orqanlarının rəhbərləri, idarə, müəssisə və təşkilatların kollektivləri, ictimaiyyət nümayəndələri, şəhidin yaxınları, şəhid ailələri, müharibə veteranları və əlilləri, rayon sakinləri və KİV mənsubları iştirak ediblər. Şəhidin cənazə namazı ailəsinin yaşadığı evdə qılınıb, dualar oxunub.
Dəfn zamanı hərbi orkestrin müşayiəti ilə Azərbaycan Respublikasının Dövlət Himni ifa olunub və yaylım atəşi açılıb.
Şəhidin tabutuna bürünmüş Azərbaycan Bayrağı şəhidin qardaşı Nizaməddin Abbasova təqdim edilib.
Şəhid Abbasov Akif İlyas oğlu 1 iyul 1970-ci ildə Daşkəsən rayonunun Əhmədli kəndində anadan olub. O, könüllü olaraq Qarabağda gedən döyüşlərə qatılıb. 28 dekabr 1993-cü ildə Ağdərə rayonunun Salahlı kəndi ərazisində erməni silahlı dəstələri ilə gedən döyüşlərdə hərbi xidməti borcunu yerinə yetirərkən şəhid olub.