"Neftçi"nin 14 yaşadək komandasının qapıçısı Said Bayramovun karyerasını Türkiyədə davam etdirmək şansı olması barədə aylar əvvəl məlumat vermişdik.
Belə ki, qardaş ölkənin 3 klubu qolkiperin xidmətində maraqlı idi.
Söhbət İstanbul nəhəngləri olan "Fənərbaxça", "Qalatasaray" və Adana təmsilçisi "Adana Dəmirspor"dan gedir.
Artıq bu məsələdə irəliləyiş var.
Belə ki, Said Bayramov bir neçə gündür Türkiyədədir.
O, "Fənərbaxça"nın U-14 komandasının məşqlərində də iştirak edib.
Amma bu o anlama gəlməsin ki, həmyerlimizin gələcəyi "Fənərbaxça" ilə bağlı olacaq.
Gənc istedad sadəcə İstanbul nəhənginin düşərgəsində genetik testdən keçib.
Elə onunla bağlı bütün suallara da testin cavabından sonra aydınlıq gələcək. Əgər hər şey arzuolunan kimi olsa, Bayramov karyerasını qardaş ölkə təmsilçilərindən birində keçirəcək.
2011-ci il təvəllüdlü qapıçı futbolun sirlərini öyrənməyə ilk olaraq "Neftçi"də İslam Kərimovun yanında başlayıb.
Bir müddət "Qarabağ" akademiyasında sevimli peşəsinə davam edən Said artıq 2 ildi "Neftçi"nin formasını geyinir.
Maraq üçün bildirək ki, istedadlı futbolçu tanınmış qapıçı, "Neftçi", "Xəzər Lənkəran", "Turan Tovuz" kimi klubların şərəfini qorumuş Kamal Bayramovun övladıdır.
XANOĞLAN/ SPORTİNFO.AZ
