Bir qrup qusarlı futbolsevər Sportinfo.az-ın redaksiyasına müraciət edib.

Onları qayğılandıran problem Şövkət Orduxanov adına Qusar şəhər stadionunun uzun illərdir diqqətdən kənarda qalmasıdır.

Məsələ ondadır ki, 1962-ci ildə istifadəyə verilən arena 9 il öncə sökülsə də, nəzərdə tutulan plan yarımçıq qalıb.

«İdman ocağı»nın tikintisi 10 aydır dayanıb. Bu səbəbdəndir ki, II Liqanın lideri olan «Şahdağ» ev oyunlarını Şamaxı Olimpiya Kompleksində keçirməli olur.

Gəlin, saytımızdan kömək istəyən yerli azarkeşləri dinləyək.

İlkin Paşayev:
- Mənim müraciətim Qusarda yerləşən Şövkət Orduxanov adına stadionla bağlı olacaq. Stadion artıq 9 ildir ki, təmirdədir. Lakin təmit olunub qurtarmır.Uzun müddətdir ki, burada heç bir iş görülmür. Sizdən xahiş edərdim ki, bu məsələni işıqlandırasız.

Müslüm Nurməmmədov:
- Sizə müraciətimin səbəbi Şövkət Orduxanov adına stadionla bağlıdır. Yəqin sizin də məlumatınız var stadionumuz uzun müddətdir təmir adı ilə sökülüb və tikib qurtarmırlar. Doğma komandamız «Şahdağ» ın oyunlarının həsrətindəyik. Qusar klubu doğma şəhərindən 4-5 saat məsafədə olan Şamaxı stadionunda ev oyunlarını keçirir. Ölkənin ən güclü idman media qurumlarından biri olduğunuz üçün sizə müraciət edirəm. Sizə ümidimiz böyükdür.

Elnar Hacımuradov:
- Mən Qusar şəhərinin sakini və futbol həvəskarı olaraq, Şövkət Orduxanov adına Qusar şəhər stadionunun təmiri məsələsi ilə bağlı müraciət edirəm. Bu stadion Qusar şəhərinin idman həyatında xüsusi əhəmiyyət daşıyan məkanlardan biri olub və «Şahdağ»ın ev oyunlarını keçirdiyi əsas arenadır. Təəssüf ki, stadionun 10 ildən artıq müddətdir təmir olunmaması həm futbolçuların, həm də azarkeşlərin rahatlığına mənfi təsir göstərir.
FIFA tərəfindən stadionun təmir və bərpası üçün 8 milyon ABŞ dolları məbləğində vəsait ayrılıb. Lakin artıq uzun illərdir ki, bu vəsaitin istifadəsi və təmir işlərinin başlanması istiqamətində heç bir irəliləyiş yoxdur. Hər il bir az təmir adıyla camaatın fikrini yayındırırlar.Bu, Qusarın idman ictimaiyyətində narazılıq yaradıb və regiondakı futbol inkişafını əngəlləyib. Stadionun təmirinin gecikməsi səbəbindən şəhərimizin gənclərinin idmana olan marağının azalması və bu idman növündə potensial imkanların gerçəkləşdirilməməsi də mümkündür. Biz Qusar sakinləri və «Şahdağ» klubunun tərəfdarları olaraq, stadionun təmirinə vəsaitin istifadəsi prosesinin sürətləndirilməsi və bu məsələnin tezliklə həll edilməsini xahiş edirik. Bu məsələ ilə bağlı lazımi addımların atılması üçün diqqət və kömək göstərməyinizi rica edirik. Əvvəlcədən sizə təşəkkür edir və ümid eləyirəm ki, yaxın gələcəkdə stadionun təmir olunaraq, şəhərimizin idman həyatına töhfə verən bir məkan kimi yenidən istifadəyə veriləcəyinin şahidi olacağıq.