![Xarici klubun baş məşqçisi azərbaycanlı yeni transferi təriflədi: “Əladır”](https://www.sportinfo.az/media/2024/01/27/uid_576827c4e8e7279f7d9b6e2e79a342ac1640024949370_width_1200_play_0_pos_0_gs_0_height_678_piotr-stokowiec-jesienia-rozstal-sie-z-lechia-gdansk-teraz-poprowadzi-zaglebie-lubin-fot-pap.jpg)
“Rahil Avropa səviyyəsində əla oyunçudur”.
Sportinfo.az xəbər verir ki, bu sözləri AZƏRTAC-a açıqlamasında LKS-in (Polşa) baş məşqçisi Pyotr Stokovets yenicə transfer etdikləri Azərbaycan millisinin futbolçusu Rahil Məmmədov barədə danışarkən deyib.
Polşalı mütəxəssis 29 yaşlı müdafiəçinin sürətli və aqressiv oyunçu olduğunu söyləyib:
“Oyunu yaxşı oxuyur. O, müasir müdafiəçiyə xas olan bütün keyfiyyətlərə malikdir”.
52 yaşlı çalışdırıcı bildirib ki, komandasına məhz R.Məmmədov kimi müdafiəçi lazım idi:
“Şadam ki, o, bizə qoşulub və komandamızın keyfiyyətini artırıb. Rahilin necə çalışdığını, işə münasibətini və məsuliyyətini görürəm. Bütün bunlar olduqca ümidvericidir”.
Rahil Məmmədov LKS klubu ilə 1,5 illik müqavilə imzalayıb. “Neftçi”nin yetirməsi olan futbolçu son olaraq “Qarabağ”ın formasını geyinib.