FCSB-nin baş məşqçisi Elias Xaralambus “Qarabağ”la bağlı fikirlərini bildirib.
Sportinfo.az Rumıniya mətbuatına istinadən xəbər verir ki, 44 yaşlı kiprli mütəxəssis yanvarın 23-də Bakıda Ağdam klubu ilə keçirəcəkləri Avroliqanın 7-ci turunun oyunu haqda danışarkən deyib:
“Avropada bütün oyunlar çətindir. Rəqibimiz (“Qarabağ” - red.) yaxşı və təcrübəli komandadır.
Avropa təcrübəsi çoxdur. Biz sübut etmişik ki, Avropada yaxşı oynayırıq və bunu yenə edə bilərik.
Qarşıdakı iki matçda ("Qarabağ" və "Mançester Yunayted"lə oyunlarda) çox xal toplamalıyıq ki, ən yaxşı 8 komanda sırasına düşə bilək”.
O deyib ki, indi onlar “Qarabağ”la oyuna köklənməlidirlər.
Baş məşqçi inandığını bildirib ki, komandası dünən “Hermannştad”la yerli liqa matçında (1:1) əldən verdiyi qol imkanlarını “Qarabağ”la oyunda istifadə edəcək.
Avroliqada 6 turdan sonra FCSB 11 xalla 10-cu, “Qarabağ” isə 3 xalla 33-cü yerdədir.