Çempionlar Liqasının Liqa mərhələsinin ən yaxşı bombardirləri 5 qollu Rafinya, Robert Levandovski (hər ikisi - “Barselona”), Hari Keyn (“Bavariya”) və Viktor Dyokereşdir (“Sportinq”). Vinisius Junior (“Real” Madrid) və Conatan Devid (“Lill”, Fransa) 4 qol müəllifləridir.

Sportinfo.az xəbər verir ki, “Bavariya” və “Lill”in futbolçuları təsnifat mərhələsi də nəzərə alınmaqla, qitənin cari mövsüm baş klub turnirinin ən yaxşı bombardirinə - “Qarabağ”ın forvardı Juninyoya çatmağa ən yaxın namizəd idilər.

Onların hər ikisi 4-cü tura qədər 5 qolu olub və bu nəticə ilə 6 qollu Juninyonun ən yaxın izləyiciləri sayılırdı.

4-cü tur artıq komandası Çempionlar Liqasında iştirak etməyən Juninyonu vahid liderlikdən məhrum edib.

Ancaq bunu Keyn deyil, Devid bacarıb. Artıq təsnifat və Liqa mərhələləri birlikdə nəzərə alınmaqla 6 qolla Juninyo və Devid öndədirlər. “Qarabağ”ın hücumçusu bu qolları 6, Devid isə 8 oyuna vurub.

5 qollular sırasında Keynlə yanaşı, yuxarıda adları çəkilən Rafinya, Levandovski, Dyokereşdən savayı təsnifat və Liqa mərhələlərində qollarını cəmləyib 5-ə çatdıran Sandro Kulenoviç (“Dinamo” Zaqreb) və təsnifatda bu həddə çatıb dayanan Arni Frederiksberq də var. 4 qollu Vinisiusun şərikləri isə Edin Ceko (“Fənərbağça”), Darius Olaru (FKSB), Fil Foden (“Mançester Siti”), Maurits Kyerqor (“Red Bull”), Viktor Olatunji (“Sparta”), Edon Jeqrova (“Lill”) və David Streletsdir (“Slovan”).