Qara Qarayevlə bağlı video çıxdı qarşıma.

“Neftçi” - “Araz-Naxçıvan” qarşılaşmasından sonra tribunadakı azarkeşlərdən biri millinin keçmiş futbolçusuna iradlarını bildirir, bəlkə də təhqir edir. Öncə klubun əməkdaşı, sonra da Qaranın özü əl-ayağa düşərək azarkeşi tribunadan kənara çağırır. Polislərin müdaxiləsi ilə ara sakitləşir.

Görüntülərə baxa-baxa “Neftçi”ylə “Qarabağ” arasında ötən mövsüm elə həmin “Neftçi Arena”da baç tutan matç yadıma düşdü. Qarayev “ağ-qaralar”ın formasını geyinən dönəmdə ağdamlı fanatların bir neçəsi Qaranın ünvanına xoşagəlməz şüar səsləndirmişdi, emosiyalar qızışmışdı.

Bir neçə ay əvvəl “Zirə”ylə oyunda Rafael Utziqlə Salifu Sumanın əlində qalan Qara matç başa çatandan sonra keçmiş komanda yoldaşı Rəşad Sadıqovun etirazı ilə üzləşmişdi.

Bu üç mənzərənin yaratdığı sual var: Qara - hardan hara?

Bir vaxtlar “Qarabağ”ın aparıcı futbolçularından, sevilən oyunçularından olan, tərbiyəsi və intizamı ilə seçilən, əl üstündə gəzdirilən adam indi kəskin etirazlarla rastlaşır, bəzi hallarda qəbul olunmur, aşağılanır.

Niyə?

İlyarım əvvəl verdiyi qərara – “Qarabağ”ı tərk etdiyinə görə.

Qara bir qarabağlı olaraq klub tarixinin əfsanəsinə çevrilə bilərdi. Müşfiq Hüseynov, Rəşad Sadıqov, Maksim Medvedev kimi. Lakin bacarmadı, zamanlamanı düzgün qiymətləndirmədi.

Qara “Qarabağ”da tanınmışdı, “Qarabağ”lı kimi sevilmişdi. Az, yaxud çox oynamasından asılı olmayaraq karyerasını da burada başa vurmalıydı. Dərindən düşünmədən, xırdalıqlara varmadan verdiyi tələsik qərar onu öncə “Neftçi”yə, ardınca “Araz-Naxçıvan”a apardı, sıradan oyunçuya çevrildi. İllərlə topladığı nüfuz parça-parça oldu.

“Qarabağ”dakı Qaranın nüfuzu hara, indiki Qara hara?

Kimdir günahkar? Özü və yenə özü.

HƏBİB