"Araz-Naxçıvan" Azərbaycan Kuboku yarımfinal mərhələsinin ilk oyunu çərçivəsində öz meydanında "Qarabağ"ı 1:0 hesabı ilə məğlub edib.
Sportinfo.az xəbər verir ki, Muxtar Respublika təmsilçisinin baş məşqçisi Elmar Baxşıyev oyundan sonra keçirilən mətbuat konfransında jurnalistlərin suallarını cavablandırıb:
- Maraqlı oyun alındı. Hər iki komanda meydanda yaxşı mübarizə apardı. Bilirdik ki, bizi bu matçda nə gözləyir. Komanda yaxşı iş ortaya qoydu. Qələbə qazandıq. Bu oyunu unudub qarşıdakı çempionat matçına hazırlaşacağıq.
- Bir top fərqi cavab oyunu öncəsi sizi nə qədər arxayınlaşdırır?
- Bu gün məğlub olsaydıq da, heç bir üstünlüyümüz, əskikliyimiz olmayacaqdı. Bilirik ki, kimə qarşı oynayırıq. "Qarabağ" reklama ehtiyacı olmayan komandadır. Çempionat oyununa köklənmək lazımdır. Vaxtı çatanda kubokun cavab matçını da düşünəcəyik.
