Premyer Liqanın birinci yarısını ən uğurlu keçirən iki komandadan biri "Araz-Naxçıvan" oldu.

Əbəs deyil ki, yekunda da Muxtar respublika təmsilçisi turnir cədvəlində yalnız "Qarabağ"ı irəli buraxdı.

Qış təlim-məşq toplanışına Bakıda start verən "qırmızı-ağlar"ın baş məşqçisi Elmar Baxşıyev də Sportinfo.az-a müsahibəsində arxada qalan dövrü yüksək qiymətləndirib.

- Arxada qalan müddətdə kollektiv yaxşı iş görə bildi. Komandaya istirahət lazım idi. Çempionatın yarısı geridə qalıb. Bundan sonrakı dönəm daha vacibdir. İstədiyimiz hədəflərə çatmaq üçün stabil çıxışı qorumaq lazımdır.

- Mövsümün birinci yarısını əla keçirdiniz. Yaranmış fasilə uğurun davamını gətirmək üçün növbəti partlayış rolunu oynaya bilərmi?

- Bəli. Buna ümid edirik. Yaxşı keyfiyyətə, xarakterə sahib kollektivdir. Düşünürəm ki, iddialarından əl çəkməyəcəklər. Daha da səylə çalışacaqlar. Futbol proqnozları sevmir. Uğur üçün futbolçular daha çox çalışmalıdır. Arzuolunan nəticələrə daha yaxın ola bilək.

- İdeal keçirdiyiniz iki dövrənin kölgəsində gizlənən hansı nöqsanlar sizi narahat edir?

- Düşüncələr fərqlidir. Kənardan ideal görünə bilər. İdealdan uzaq olduğumuzu komanda da bilir, mən də bilirəm. Artırmağa yerimiz var. Daha yaxşı ola bilərik.

- Yoxlama görüşlərində də Premyer Liqa klubları ilə üz-üzə gəlmək bezdirici olmayacaq?

- Hər tərəfli yanaşmaq lazımdır. Futbolçuların istirahəti də önəmlidir. Bunu əllərindən almaq olmaz. Düşündük ki, 1 yoxlama oyunu üçün ölkə xaricinə getmək effektiv olmayacaq. Psixoloji durumu nəzərə alaraq Bakıda qaldıq. Eyni rəqiblə oynamaq futbolçuya bezdirici olmamaldır. Onun işi, sənəti budur.

XANOĞLAN İMANOV