"Araz Naxçıvan" Premyer Liqaya "Qarabağ"dan ağır məğlubiyyət almaqla başlamışdı - 1:4.
Amma darmadağın Muxtar respublika təmsilçisinə psixoloji baxımdan zərər vurmadı.
Əksinə, özündə güc tapan Elmar Baxşıyevin kollektivi qarşısına çıxan rəqiblərə şans tanımadı.
Və uğurlu seriya nə az, nə çox 15 görüşdə davam etdi.
Yalnız son turda "Sabah" onlara "dur" deyə bildi - 0:1.
Maraqlıdır ki, "köhlən atlar"a məğlubiyyətdən sonra başlayan uğurlu seriya məhz elə ağdamlılarla oyundan öncə başa çatdı.
"Qarabağ"dan alınan məğlubiyyət komandaya yaxşı təsir etmişdi. Sonrakı nəticələr bunu deyir. Bəs "Qarabağ"la oyundan öncəki məğlubiyyət kollektivə necə təsir edə bilər?
Sportinfo.az-a açıqlamasında komandanın təcrübəli baş məşqçisi Elmar Baxşıyev bunları dedi:
"Məğlubiyyət də futbolun bir hissəsidir. Bəli, uğurlu seriya yaxalamışdıq.
Əslində, "Sabah"la oyunda da komanda olaraq yaxşı çıxış etdik. Qol epizodları yaratdıq, amma istifadə edə bilmədik.
Ab-havaya gəldikdə uşaqlar həvəslidir. "Qarabağ"ın gücünə də, heyətindəki futbolçuların keyfiyyətinə də bələddirlər.
Ancaq bu məqamlar bizi geri çəkilməyə yox, oyuna daha yaxşı motivasiya olmağa məcbur edir.
Maraqlı oyun olacaq. Bu 2024-cu ildə keçirəcəyimiz sonuncu rəsmi oyundur. İstəyirik ili yaxsi nəticə ilə yekunlaşdıraq".
XANOĞLAN
