"Araz-Naxçıvan"ın hücumçusu Ülvi İsgəndərov Premyer Liqanın 14-cü turunda "Kəpəz"i məğlub etdikləri (2:0) matçdan sonra Sportinfo.az-a açıqlama verib.
Təcrübəli futbolçu ilk öncə qələbə barədə fikirlərini bizimlə bölüşüb:
"Ağır oyun olacağını bilirdik. Çünki meydança sünidir. Amma milli komandalara görə yaranmış fasilədə yaxşı hazırlıq keçə bilmişdik. Düzdü, istədiyimiz kimi oynamadıq, amma şükürlər olsun ki, qələbə qazandıq".
"Kəpəz" üzərindəki qələbədən sonra Muxtar respublika təmsilçisinin məğlubiyyətsiz seriyası 13-ə yüksəldi.
İsgəndərov bu şəkildə uğurlu çıxışın onu təəccübləndirmədiyini qeyd edib:
"Bugünkü nəticələr mənim üçün sürpriz deyil. Çünki yaxşı heyətimiz var. Elmar müəllim də məni dəvət edəndə bilirdim ki, iddialı bir komanda qurulur.
Qara Qarayev və Meza Kollinin gəlişindən sonra heyət tam formalaşdı".
XANOĞLAN
