“Araz-Naxçıvan”ın cari mövsümdə uğurlu çıxışında yeni transferlərin böyük payı var.
Yayda komandaya cəlb olunmuş Felipe Santos, Benni və Ramon Maçadodan ibarət “üçlük” birlikdə 9 qola imza atıb ki, bu, Muxtar Respublika təmsilçisinin məhsuldarlıq göstəricisinin 70 faizi deməkdir.
Bu futbolçular komandaya gələndən sonra ötən mövsüm “Araz-Naxçıvan”ın əsas simaları sayılan Nunu Rodrigeslə Miço Kuzmanoviç sanki kölgəyə çəkilib.
Təkcə bir faktı qeyd etmək yerinə düşər. Vaxtilə Bosniya və Hersoqovinanın U-21 millisinin şərəfini qorumuş Kuzmanoviç 2023/24 mövsümündə meydana çıxdığı 10 oyunda (8-i əsas heyətdə olmaqla) cəmi 1 qola imza atıb.
Halbuki keçən “futbol ili”ndə şans qazandığı 35 görüşdə aktivinə 3 qol və 6 assist yazdırmışdı.
Bosniyalı vinger Sportinfo.az-a açıqlamasında üzdə olmamasının səbəbini bu cür izah edib:
“Şəxsi həyatımda və sağlamlığımda heç bir problem yoxdur. Həminki Miçoyam.
Fərq ondadır ki, bu il daha çox komanda oyunu sərgiləyirik. Ötən mövsüm oyun ayrı-ayrı fərdlərin üzərində qurulurdusa, bu il fərqlidir.
Bilirəm, Azərbaycana yeni gəldiyim dönəmdəki qədər effektli deyiləm.Ola bilsin, 1 il əvvəl daha çox seçilirdim.
Ancaq indi komandada texnikalı və sürətli futbolçuların sayı çoxdur. Ona görə də konkret adlar fərqlənmir”.
HƏBİB
